Almatyda 29 jastaǵy er adam Qyrǵyzstanda tirkelgen «Honda Odyssey» kóligin urlap ketti, dep habarlaidy QazAqparat.
Almaty qalalyq politsiia departamentiniń málimetinshe, ustalǵan azamat tek Qyrǵyzstanda tirkelgen Honda Odyssey kólikterin urlaýǵa mashyqtanǵan. Kúdiktini áshkereleý jáne ustaý is-sharasyn Alataý aýdandyq PB janyndaǵy politsiia bóliminiń jáne kriminaldyq politsiianyń qyzmetkerleri júrgizdi.
«Jedel-izdestirý is-sharalaryn júrgizý barysynda kúdikti anyqtalyp, turǵylyqty jeri Almaty oblysy, Qarasai aýdanynda ustaldy. Anyqtalǵandai, buryn tonaý jáne urlyq jasaǵany úshin sottalǵan 29 jastaǵy K. esimdi azamat, túnde qulypty ashatyn jáne qozǵaltqyshty iske qosýǵa arnalǵan arnaiy tehnikanyń kómegimen Honda Odyssey avtokólikterin urlap kelgen», – dedi Almaty qalalyq PD Kriminaldyq politsiia basqarmasynyń bastyǵy Qýatbek Naýatov.
Alataý aýdandyq politsiia basqarmasy janyndaǵy politsiia bóliminiń bastyǵy Qumarbek Kenshinbaev kúdiktiniń urlanǵan kólikterdi satýmen ainalysqanyn atap ótti. Kúdikti sońǵy ret urlaǵan kóliginen qutylyp úlgermedi. Kólik tabyldy jáne tárkilendi.
Qylmystyq is QR QK-niń 188-baby 3-bóligi boiynsha tergelýde. Kúdikti ýaqytsha ustaý izoliatoryna qamaldy.
