Almatyda turǵyndar respýblikalyq tasjoldy jaýyp tastady, - dep habarlaidy Tengrinews.kz agenttigi.
Áńgime "Altyn Orda" bazary mańyndaǵy, "Aport" saýda ortalyǵyna qarama-qarsy ornalasqan "Nurly dala" turǵyn úi kesheni týraly bolyp otyr. Jergilikti turǵyndardyń aitýynsha, munda 10 kúnnen beri sý joq. 16 qazanda keshke ondaǵan adam Tashkent tasjolynyń shyǵys baǵytyna shyqqan.
Jolǵa áielder men er adamdar, qarttar men balalar shyǵyp, kólik qozǵalysyna kedergi jasaǵan. Saldarynan bir shaqyrymǵa sozylǵan kólik keptelisi boldy. Áleýmettik jelide jariialanǵan videolardyń birinde jinalǵandardy taratyp, júrgizýshilerdi ótkizýge shaqyrǵan politsiia qyzmetkerin kórýge bolady.
Jaǵdaiǵa qatysty Almaty qurylys basqarmasy pikir bildirdi. Vedomstvo málimetinshe, "Nurly dala" turǵyn úi kesheni ýchaskesinde apat bolýy saldarynan sý joq.
"Nurly daladaǵy" sýmen jabdyqtaý júiesi 2019 jyly salynǵan. Jobada bolat qubyrlar qarastyrylǵan, biraq qurylys barysynda merdiger olardy shynyplastik qubyrlarǵa aýystyrǵan, saldarynan ol jii isten shyqty. Jobalyq sheshimdi ózgertýdiń negizdiligi men júrgizilgen jumystardyń sapasyn sarapshylar baǵalaidy jáne nátijesi boiynsha tiisti sharalar qabyldanady. Qajetti tapsyrmalar qala prokýratýrasyna berildi jáne jaýaptylar zańnyń barlyq qatańdyǵy boiynsha jaýapqa tartylady", - dep sendirdi basqarma ókilderi.
Apat ornynda qalpyna keltirý jumystary júrip jatqany atap ótildi. Qubyrlar aýystyrylyp, sý burylady. Jóndeý jumystarymen "Almaty sý", Qurylys basqarmasy men Naýryzbai aýdany ákimdiginiń qyzmetkerleri ainalysyp jatyr.
