Almatyda «Toyota Camry» kóligi apat saldarynan dámhananyń jazǵy alańyna kirip ketti, dep habarlaidy QazAqparat.
Qalalyq politsiia departamentiniń málimetinshe, jol apaty 24 mamyr kúni keshki saǵat 19:47 kezinde bolǵan.
«Tóle bi kóshesi boiymen batys baǵytta, Áýezov kóshesiniń qiylysynda kele jatqan «Toyota Camry» kóliginiń júrgizýshisi solǵa burylyp jatyp, Tóle bi kóshesimen shyǵys baǵytta kele jatqan «Volkswagen Polo» kóligine soǵylǵan. «Volkswagen» júrgizýshisi kóligin qaldyryp, oqiǵa ornynan ketip qaldy. Al soqtyǵys saldarynan «Toyota Camry» avtokóligi inertsiiamen Tóle bi kóshesiniń boiymen shyǵys baǵytta júrip kelip, qoǵamdyq tamaqtaný orny ornalasqan ǵimaratqa kirip ketken. Bir áiel zardap shegip, aýrýhanaǵa jetkizildi»,- dep habarlady Almaty politsiia departamentiniń baspasóz qyzmeti.
Vedomstva ókilderi, atalǵan derek Almaly aýdandyq politsiia basqarmasynda tirkelgenin aitty. Onyń nátijiesi boiynsha protsessýaldyq sheshim qabyldanady.
