Almatynyń kóshkin júrý qaýpi bar aýmaqtarynda qurylys júrgizýge tyiym salynady. Bul týraly Erbolat Dosaev máslihat otyrysynda málim etti, dep habarlaidy QazAqparat.
«Taý betkeiiniń tiktigi 15 gradýstan artyq bolýy jáne injenerlik-geologiialyq qurylymyna qarai, aýmaqtyń seismikalyq deńgeiiniń joǵarylyǵy (máselen, tereńdigi 20 metrden asatyn sazdy topyraq) kóshkin júrý qaýpin týdyrady. Osyǵan bailanysty, kez kelgen maqsattaǵy ǵimarattardyń jańa qurylysyna tyiym salynady», - dedi Erbolat Dosaev.
Sonymen qatar, ol 2017 jyly toqtap qalǵan qala qurylysy keńesi 1 tamyzdan bastap jańa formatta qaita jumys isteitinin aitty.
«Táýelsiz sarapshylardy tartý jáne qala qurylysy boiynsha sheshimder qabyldaýda olardyń rólin arttyrý kózdeledi. Bul úshin biz qurylys salýshylarǵa qoiylatyn mindetti talaptardy jáne jobalardy qoǵamdyq talqylaýdan ótkizý, sondai-aq ornalasqan jerine qaramastan, 5 qabattan asatyn barlyq ǵimarattar men qurylystar úshin qala qurylysy keńesiniń oń qorytyndysyn alý sharttaryn bekitýdi usynamyz», - dedi Almaty ákimi.
Qala depýtattary ákim usynǵan jańa normalardy biraýyzdan qoldady.
