3 tamyz kúni Almatyda 25 jastaǵy taksist qyzǵa qaraqshylyq shabýyl jasaldy. Politseiler budan buryn qaraqshylyq pen urlyq úshin sottalǵan kúdiktilerdi jedel ustady, dep habarlaidy "Ult aqparat".
Politsiia departamentiniń baspasóz qyzmetinen málim etkendei, Iandeks.taksidiń júrgizýshisi bolyp jumys isteitin 25 jastaǵy qyzǵa shabýyl jasalǵan. Túngi eki shamasynda ol shaqyrtýdy qabyldap, «Saiahat» aýdanyna jetkizý kerek bolǵan klientterdi alyp ketedi.
«Onyń aitýynsha, kólikke eki mas jigit otyrǵan. Kórsetilgen jerge jetkennen keiin olardyń bireýi qyzdyń moinyna buǵalyq salǵan. Taksist qyz esinen tanyp, jolaýshylar otyratyn artqy oryndyqtyń astynda oianady. Qyzdyń bank kartasy men telefonyn alyp, ony «Terekti» shaǵynaýdanynda kólikten tastap jibergen. Keiin júrgizýshi qyz politsiia shaqyrdy», - dedi PD-de.
Kelgen politseilerge ol kúdiktilerdiń belgilerin aityp berdi. Jedel-izdestirý sharalaryn júrgizý barysynda 1987 jáne 1998 jyly týǵan er adamdar ustaldy.
Atalǵan fakti Sotqa deiingi tergep-tekserýdiń biryńǵai tizilimine engizilip, QR QK-niń 191-baby 2-bóligi 3-tarmaǵyna sáikes qylmystyq is qozǵaldy. Kúdiktiler ýaqytsha ustaý izoliatoryna qamaldy.
