Almatyda sport kolledji jabylmaidy. Bul týraly áleýmettik jelilerde mádeniet jáne sport ministri Dáýren Abaev habarlady, dep jazady Sputnik Qazaqstan.
Onyń aitýynsha, bilik Almatyda respýblikalyq sport kolledji óz jumysyn jalǵastyrady degen pikirge keldi.
"27 mamyrda Almatyda respýblikalyq mańyzy bar mektep-internattardy damytý máseleleri jóninde keńes ótti. Sporttyq oqý uiymdarynyń direktorlary shaqyryldy. Nátijesinde biz ortaq sheshimge keldik. Kolledjdiń ornyna ashylady dep josparlanǵan jattyǵý ortalyǵy endi kolledj janynan ashylady. Ol jyl boiy jumys istep, sport mekemeleriniń jumysyn kúsheitedi", - dedi mádeniet jáne sport ministrliginiń basshysy.
Abaev sportshylar karerasyn jalǵastyrýǵa múmkindik alatynyn, mekemeni qurýda ozyq halyqaralyq tájiribeni eskeriletinin atap ótti. Sondai-aq, keńes barysynda aldaǵy 2022-2023 oqý jylyna kolledjge túsý úshin muqiiat irikteý jáne sapaly qabyldaý tapsyryldy.
2011 jyly kolledj bazasynda birneshe eksperimentaldy synyp ashylǵan bolatyn. Ministr olarda oqyǵan balalar sapaly sporttyq bilim alyp, materialdyq baza standarttarǵa sáikes keletin jerde sportpen shuǵyldaný múmkindigine ie bolýǵa tiis dep habarlady.
"Sondyqtan bul synyptar Qarken Ahmetov atyndaǵy olimpiada rezerviniń respýblikalyq mamandandyrylǵan mektep-internat-kolledji jáne Almaty qalasynyń "Shańyraq" shaǵyn aýdanyndaǵy olimpiada rezerviniń respýblikalyq mamandandyrylǵan mektep-internat-kolledjine beriledi", - dep atap ótti Abaev.
Eske sala ketsek, Almatydaǵy sport kolledjiniń ainalasyndaǵy daýdyń bastalǵanyna biraz boldy.Sportta daryndy balalardyń ata-analary oqý ornynyń jabylýy týraly kútpegen jańalyqqa narazy boldy. Oqý ornynyń basshylyǵy oqýshylardy basqa mektepterge jiberip, kolledjdi reformalaýdy josparlady. Sport kolledjiniń ornynda olimpiadalyq rezervti daiyndaý ortalyǵyn ashýdy josparlandy.
