Almatyda politsiia qyzmetkeri órtengen qonaq úiden uiyqtap jatqan adamdy aman alyp shyqty, dep habarlaidy "Ult aqparat".
Keshe saǵat 22.30 shamasynda Alataý aýdanyndaǵy Shosseinaia kóshesindegi qonaq úi kesheninen órt shyqqan.
«Qolastymda qyzmet etetin qyzmetkerlerim maǵan qońyraý shalyp, qonaq úi órtenip jatqanyn habarlady. Men jumysqa tez keldim, arnaiy qyzmet ókilderi shaqyryldy. Osyǵan orai erekshe rizashylyǵymdy bildirgim keledi. Keshe kóshede ótip bara jatqan jigit bólmede uiyqtap jatqan jas jigitti qutqaryp, óz ómirin qaterge tikti. Keiin belgili bolǵandai, bul – Alataý aýdanynyń politsiia qyzmetkeri eken», – dedi qonaq úi kesheniniń iesi.
Áńgime Alataý aýdany PB bastyǵynyń orynbasary Janserik Myńjasarov týraly bolyp otyr.
Órt shyqqan kezde ol Shańyraq shaǵynaýdanyna kezekshiligine bara jatqan.
«Men Soltústik ainalma kóshesimen ońtústik baǵytta kele jattym. Qonaqúiden shyǵyp jatqan tútindi kórdim. Dereý kóligimdi qoia salyp júgirdim. Ǵimarattyń aldynda 10 shaqty adam boldy. Men ákimshiden «ishinde adamdar bar ma?» dep suradym. Ol 108-bólmede er adam bar ekenin jáne onyń qalyń uiqyda jatqanyn aitty. Sosyn birden ekinshi qabatqa kóterildim, tútin tym qoiý eken. Esikti syndyrýǵa týra keldi. Amalyn taýyp, álgi adamdy kóshege alyp shyqtym», – deidi podpolkovnik Myńjasarov.
Qutqarylǵan adam Almatyǵa issaparmen kelgen. Ol ómirin qutqarǵan politseige alǵysyn aitty.
