Almatyda pedofil 20 jylǵa sottaldy. Bul týraly qalalyq Politsiia departamenti basshysynyń orynbasary Rýstam Abdrahmanov málim etti, dep habarlaidy "Ult aqparat".
1996 jyly týǵan Noori Khalil esimdi azamat 2019 jyldyń qarashasynan 2020 jyldyń 2 jeltoqsany aralyǵynda 2010 jyly týǵan «S» esimdi jetkinshekke qatysty seksýaldyq sipattaǵy zorlyq-zombylyq jasaǵany habarlandy.
«2020 jyldyń 3 jeltoqsanynda jábirlenýshi jetkinshektiń anasy úide kir kiimderdi tazalaý kezinde aq daqtar jaǵylyp bylǵanǵan ulynyń ish kiimin taýyp alǵan. Uly túnde uiyqtap jatqanda, Noori Khalil onyń qasynda jatyp, azǵyndyq áreketter jasaǵanyn aitqan. Belgili bolǵandai, Noori Khalil balanyń anasynyń birge turatyn adamynyń dosy bolǵan, keide olardyń úiinde qalyp túneitin. Uialy telefonmen birge oinaýdy syltaýratyp balamen bir bólmede uiyqtaityn sátti paidalanǵan azǵyn balany janyna jatýǵa shaqyrǵan. Pedofildiń oiynan kúmándanbaǵan bala onyń usynysyna kelise ketken. Osylaisha sottalýshy óziniń qylmystyq nietin júzege asyrǵan», - dep atap ótti Rýstam Abdrahmanov.
2020 jyldyń jeltoqsanynda bolǵan qylmysty tergeý barysynda aiyptalýshynyń 2019 jyldyń qarasha aiynda osyǵan uqsas taǵy bir qylmysqa qatysy bar ekeni anyqtaldy.
«Balanyń aitýynsha, ol Noori Khalil-di óziniń úlken aǵasy retinde qabyldap, olardyń úiine kelgende ony «Han» dep ataǵan. Kúdiktiniń qylmystyq áreketteri QR QK- niń 121-baby 4-bóligi (jas balaǵa qatysty birneshe ret jasalǵan seksýaldyq sipattaǵy zorlyq-zombylyq áreketteri) boiynsha anyqtaldy», - dedi ol.
Sot úkimimen Noori Khalil-ge pedagogikalyq laýazymdardy jáne kámeletke tolmaǵandarmen jumys isteýge bailanysty laýazymdardy atqarýǵa ómir boiyna tyiym salynyp, 20 jylǵa bas bostandyǵynan aiyrý jazasy taǵaiyndaldy.
