Foto: pexels
"Imamdardy jolatpai, juma namaz jabyq túrde oqyldy". Almatydaǵy pansionattardyń birinde turǵan jasóspirim mekeme ishindegi astyrtyn áreketterdi aityp berdi, dep habarlaidy Almaty.tv.
Onyń sózinshe, qaiyrymdylyq qoryna qaraityn jataqhanada tipti shetel azamattary dini taqyrypta emtihan tapsyrtqan.
Eske salaiyq, buǵan deiin aqparat kózderinde quzyrly organdardyń dál osyndai balalar pansionatyna qatysty qylmystyq is tergep jatqany aitylǵan edi.
"Ol jaqqa barǵaly imamdardy kórgen joqpyn", – deidi jasóspirim.
Esimin jariia etý turmaq, túrin kórsetýge qoryqqan jasóspirim daýsyn da ózgertýdi suraǵan. Alaida ol pansionat qyzmetkerleriniń jasyryn áreketin jasyrmai aityp berdi. Sózine sensek, pansionat ustazdary jabyq ári júieli túrde dini joralǵylar ótkizgen. Tipti, ózge tilde dáris bergen kezderi de bolǵan.
"Juma kúni tekseris keldi. Ol kúni juma namazy oqylmady. Bizge tekseris jaily aldyn ala eskertti. Kitaptarymyzdy sórege salyp, tyǵyp qoidyq", – deidi jasóspirim.
Jasóspirim "jaǵdaidy birden ata-anama aitýǵa o basta batylym barmady" deidi. Alaida keiin shyndyqty jasyrmai, is nasyrǵa shappai turǵanda mekemeden birjola ketýdi jón sanapty.
"Basynda balamdy "eń myqty ýniversitetke oqýǵa túsiremiz" dep sendirgen. Oǵan esh aram oiymsyz, qýandyq. Keiin ulym da, birge ketken 70 bala da ýniversitette emes, medrese atyn jamylǵan mekemede turatyny belgili boldy. Onda baskóz bolǵan "ustazsymaqtar" olarǵa kúsh qoldanǵan", – deidi ata-analardyń biri.
Quzyrly organdar dereginshe, mundai pansionattar Almatyda ǵana emes, eldiń ózge óńirinde de bar. Jalpy sany 90-nan asady. Jáne barlyǵy bir qaiyrymdylyq qoryna qaraidy. Buǵan deiin olar Múftiiatpen memorandým jasasý arqyly jumys istegen.
"Din jáne zań boiynsha zańsyzdyqtar tabylyp jatqannan keiin QMDB "Jibek joly" qaiyrymdylyq mekemesimen jasasqan memorandýmdy toqtatty", – deidi QMDB Almaty qalasy boiynsha pátýa baǵytyna jaýapty maman Elbek Tasbolatuly.
Dintanýshynyń aitýynsha, medrese atyn jamylǵandar imamdy jolatpai, "úi ishinen úi tigip" óz erejesimen júrýiniń ózi qoǵamǵa tóngen qaýip.
"Der kezinde myna dertti emdemese, "súleimenshilerdi" qolǵa almaǵan jaǵdaida, olar da kúsh jinaǵan kezde shynaiy betperdesin kórsetedi. Birinshiden, Dini basqarmaǵa baǵynbaǵany úlken qaýip tóndiredi. Ekinshiden, ózderiniń jasyryn qulshylyǵy shariǵatqa qaishy bolǵandyqtan, ol da bir qaýip", – dedi teolog Rýslan Qaiyrgeldi.
Qańtar aiynda áleýmettik jelide taraǵan beinejazbaǵa tártip saqshylarynyń pansionattar mańynda júrgeni taspalanǵan. Politsiia departamentiniń ókilderi sol kezde tekserý júrgizilip, oqiǵa ornynan "Qazaqstanda ekstremistik dep tanylǵan jáne taratýǵa tyiym salynǵan materialdar tabylǵanyn" habarlady.
"Pansionattyń ishinde jasóspirimder zańsyz dini joralǵylar jáne ujymdyq duǵalarǵa qatysqan. Al kelispegen kishkentai balalarǵa qysym kórsetken. Tamaq, sý bermei, kei kezde qol kótergen. Osy derekter belgili bolǵannan keiin politsiia tarapynan is-áreket jasaldy. Qazirgi tańda qylmystyq is tergeý basqarmasynda", – dedi Politsiia departamentiniń resmi ókili Saltanat Ázirbek.
Politsiia ózge aqpar tergeý múddesine sai jariia etýge jatpaitynyn málimdedi. Búginde egjei-tegjeili tekserý jumystary júrgizilip jatqanyn ǵana aitty.
