Almaty politsiiasy órtenip ketken jihaz tsehynda mert bolǵan áieldiń ólimine qatysty qylmystyq is qozǵady, dep habarlaidy QazAqparat.
Almaty politsiia departamentiniń habarlaýynsha, órtengen jihaz sheberhanasynda óli tabylǵan áieldiń kim ekeni anyqtaldy. Ol osy tsehta jumys isteitin 59 jastaǵy áiel bolyp shyqty.
«Bul fakti sotqa deiingi tergep-tekserýdiń biryńǵai tiziliminde tirkeldi. Bul QR QK 292-babynyń 2-bóligi boiynsha órt qaýipsizdigi talaptaryn buzý. Atalǵan qylmystyq is boiynsha sot-meditsinalyq saraptama men tiisti saraptamalyq zertteýler taǵaiyndaldy», - dep habarlady Almaty qalalyq PD.
Eske sala ketsek, Jetisý aýdanynyń Ratýshnyi kóshesindegi sheberhana órtendi. Tilsiz jaý tsehtyń 1 200 sharshy metr aýmaǵyn sharpyǵan. Onyń sóndirýge 20 tehnika men 60 adam jumyldyryldy. Órt sóndirilgen soń jihaz tsehynan áiel adamnyń denesi tabylǵan bolatyn.
