Almatyda 76 jastaǵy zeinetker nemeresimen birge esirtki shóbin ósirgen, dep habarlaidy "Ult aqparat".
Almaty qalalyq Politsiia departamentiniń málimetinshe, Alataý aýdanyna qarasty «Áigerim» yqshamaýdanyndaǵy úilerdiń birinde 76 jastaǵy turǵyn nemeresimen birge qarasora jáne marihýana ósirgeni anyqtaldy.
«G.esimdi áieldiń turǵylyqty jeri boiynsha jedel-izdestirý sharalaryn júrgizý barysynda jasyl tústi, erekshe iisi bar ósimdik tektes 117 buta tabyldy jáne tárkilendi. Sot-meditsinalyq saraptama qorytyndysyna sáikes, tárkilengen esirtki – keptirilmegen marihýana bolyp shyqty, onyń jalpy salmaǵy 6 keli 680 gramm», – dedi Almaty qalalyq Politsiia departamentiniń Esirtki qylmysyna qarsy kúres basqarmasy bastyǵynyń orynbasary Saǵyndyq Aiaǵanov.
Onyń aitýynsha, qazirgi ýaqytta Alataý aýdandyq politsiia basqarmasynda kúdiktige qatysty QR QK-niń 300-baby 1-bóligi boiynsha sotqa deiingi tergeý júrgizilip jatyr.
