Almatyda kóktemde qurylys alańynda KB-308 relsti munara krany qulaýynyń sebebi anyqtaldy, dep habarlaidy QazAqparat agenttigi.
Biyl sáýir aiynda Almatynyń «Jas qanat» shaǵynaýdanynda KB-308 relsti munara krany 9 qabatty ǵimarattyń parapetine qulaǵan bolatyn.
Osyǵan orai quramynda Almaty qalalyq ónerkásiptik qaýipsizdik departamenti men túrli múddeli taraptardyń ókilderi bar komissiia apatqa tekseris júrgizdi.
Komissiianyń málimetinshe, tekseris obektivti jáne jan-jaqty júrgizý maqsatynda «TehBez Almaty» JShS-nyń tehnikalyq saraptamasy taǵaiyndaldy.
Krannyń metall konstrýktsiialarynyń úlgilerin «SAPA INTERSISTEM» JShS synady. Kran bólshekteriniń metalyna metallografiialyq taldaý júrgizildi.
«Kran elementterin zertteý boiynsha ónerkásiptik qaýipsizdik saraptamasynyń qorytyndysy negizinde krannyń qulaýynyń yqtimal sebebi - kran qulaǵan jerdegi rels jolynyń shógýi, sondai-aq, kran sektsiialary shpilkalarynyń burandaly qosylystarynyń tozýy jáne sozylýy.
Sondai-aq, komissiia ónerkásiptik qaýipsizdik talaptarynyń birqatar buzýshylyqtaryn anyqtady:
- óndiristik baqylaý uiymdastyrylmaǵan;
- óndiristik baqylaý týraly ereje ázirlenbegen;
- ónerkásiptik qaýipsizdik jaǵdaiyna tekserý júrgizý kestesi bolmaǵan;
- júk kótergish krandardyń, almaly-salmaly júk qarmaý qurylǵylary men ydystardyń qaýipsiz paidalanylýyn qadaǵalaý boiynsha jaýapty injenerlik-tehnikalyq qyzmetker, kran joldarynyń tehnikalyq jai-kúiin tiisti túrde qadaǵalaýdy júzege asyrmaǵan jáne ónerkásiptik qaýipsizdik qaǵidalaryn buzýdyń aldyn alý úshin shara qoldanbaǵan», - delingen komissiia habarlamasynda.
Tekseris nátijesi boiynsha komissiia apattyń sebepterin joiý jáne bolashaqta osyndai jaǵdailardy boldyrmaý jóninde usynymdar berdi.
Al qurylys kompaniiasy injenerlik-tehnikalyq qyzmetkerdi jaýapkershilikke tartty.
