Almaty qalasynda koronavirýs epidemiiasyna qarsy sharalarǵa 9 milliard teńgege jýyq qarjy bólingen. Onyń 5,5 milliard teńgeden astamy koronavirýsqa qarsy kúresip jatqan densaýlyq saqtaý nysandary qyzmetkerleriniń jalaqysyna qosymsha ústemeaqy retinde qarastyrylǵan. Bul týraly «Áleýmettik meditsinalyq saqtandyrý qory» KEAQ Almaty qalalyq filialy málim etti.
Qordyń habarlaýynsha, virýsqa qarsy kúreske jumyldyrylǵan meditsina nysandarynyń tizimin Almaty ákimdigindegi arnaiy komissiia bekitken. Tizimge sáikes, sáýir aiy úshin meditsina mamandaryna tólenetin ústemaqy 1,5 milliard teńgeni qurady.
«Maýsymnyń birindegi málimet boiynsha, almatylyq 5398 meditsina qyzmetkeriniń jalaqysyna qosymsha aqy retinde 1,5 milliard teńge tólendi. Qazirgi tańda qalada epidemiiaǵa qarsy is-sharalarǵa 86 densaýlyq saqtaý nysany jumyldyrylǵan. Esterińizge sala ketsek, qosymsha tólemder densaýlyq saqtaý salasy qyzmetkeriniń ómirine tóndiretin qaýip deńgeiine qarai tólenedi» , - dedi ÁMSQ Almaty filialy basshysy Tileýhan Ábildaev.
