Almaty qalasynyń Mádeniet nysandary karantin sharalaryn saqtai otyryp, shtattyq rejimde jumys istep jatyr, dep habarlaidy "Ult aqparat".
Amaty qalasynyń bas sanitarlyq dárigeri Jandarbek Bekshinniń qaýlysyna sáikes, karantinniń jeńildetilýine bailanysty 1 qyrkúiekten bastap qalada murajailar, kitaphanalar men haiýanattar baǵy qalypty rejimde jumys istei bastady.
«Almaty qalasynyń mýzeiler birlestigi» KMQK (Almaty murajaiy, Yqylas atyndaǵy ulttyq aspaptar mýzeii, D. A. Qonaev mýzei, N. Tilendiev atyndaǵy memorialdyq murajai, S. Muqanov jáne Ǵ. Músirepov atyndaǵy ádebi-memorialdyq murajai kesheni, Raiymbek batyr dástúrli mýzyka mýltimediialyq murajai kesheni) kúndelikti 10:00–den 19:00–ge deiin jumys isteidi.
Aita keteiik, Yqylas atyndaǵy halyq mýzykalyq aspaptar murajaiynda Aziia jáne Eýropa mýzykalyq aspaptarynyń jańa zaldary ashyldy.
Karantin kezinde Almaty haiýanattar baǵynda kerik, zebra, Prjevalskii jylqysynyń qulyny, buǵy, aqbóken, túie, japon tyrnasy, emý túiequsy dúniege keldi. Ártúrli qustar men janýarlardyń júzden astam balasy bar. Barlyq tóldegen janýarlar tólderimen birge ekspozitsiiada.
Haiýanattar baǵy kúndelikti saǵat 9:00-den 19:00-ge deiin jumysyn qaita bastady. Tek kassalar bir saǵat buryn erte jabylady.
Qalalyq kitaphanalar da ádettegidei 9:00-den 20:00-ge deiin jumys isteidi.
Sondai-aq, kitaptardy úige 15 kúnge alýǵa bolady. Ortalyqtandyrylǵan kitaphana júiesi onlain rejiminde kóptegen basqa is-sharalardy ótkizedi. Atap aitqanda, qazan aiynda balalar jazýshysy S. Begalinniń 125 jyldyǵyna arnalǵan onlain rejiminde halyqaralyq konferentsiia ótkizý josparlanýda.
Mádeni nysandarǵa kiretin kezde qatań túrde áleýmettik qashyqtyqty jáne qorǵanys maskalaryn taǵyp kirý qajet.
