Almaty qalasy sanitariialyq-epidemiologiialyq baqylaý departamentiniń basshysy, qalanyń bas memlekettik sanitariia dárigeri Jandarbek Bekshin qalanyń jabylýyna qatysty pikir bildirdi, dep habarlaidy QazAqparat.
Jandarbek Bekshinniń aitýysha, Almatynyń sanitariialyq-epidemiologiialyq baqylaý departamentinde epidemiologiialyq baǵalaý júiesi engizildi. Budan bylai barlyq faktorlardy eskere otyryp, apta saiyn engiziletin shekteý jáne ruqsat berý sharalaryna baǵalaý júrgiziledi.
Jańa halyqaralyq ádis indetke shaldyqqandardyń infektsiiany qaidan juqtyrǵandaryn taldaýǵa múmkindik beredi. Olardyń úi oshaǵy, jumys orny boiynsha bailanysy, áýe jolaýshylardyń infektsiia ákelýi, juqtyrýy yqtimal oryndar taldanyp, baǵalanady. Sonyń nátijesinde kei sharalar qatańdatylyp, tiimsizi múlde joiylady.
«Epidemiologiialyq tekserý barysynda naýqastar bazarda, dúkende, ne avtobýsta, metromen júrgen kezde juqtyrǵanmyn dep ózi aitady. Maska taqpaimyn, toida betperdesiz boldym. Nashar jeldetkish boldy, 5-6 saǵat bir orynda otyrdyq degen kóptegen túsiniktemeleri bar. Sonyń bárin taldap, retteimiz», – dedi Jandarbek Bekshin.
Jandarbek Bekshin, sondai-aq, qalanyń jabylýyna qatysty pikirin bildirdi.
«Árine, qazirgi ahýal kúrdeli. Biraq qystan beri jasaǵan daiyndyǵymyz qazirgi jaǵdaidan ótýge múmkindik berip otyr. Búginde 7 011 tósek-oryn bar. Bos tósek-oryn sany 44,9 paiyz (2 520 oryn). Jansaqtaý bólimindegi tósek-oryndardyń 62 paiyzy bos. Sondyqtan jaǵdai Qoǵamdyq densaýlyq saqtaý uiymynyń baqylaýynda, másele kúndelikti baqylaýda. Alańdatatyn problema joq. Sebebi bári aýrýhanaǵa der kezinde jatqyzylyp jatyr. Olardyń sany 250-270 shamasynda, 500-ge jetken joq. Sondyqtan qazirgi tańda lokdaýn, qalany jabý degen áńgime joq», - dedi ol.
