Almatyda Qytaidan kelgen biznesmendi urlap ketti. Degenmen táýlikke jeter-jetpes ýaqyt ishinde politsiia shetel azamatyn qutqarǵan, dep habarlaidy "Ult aqparat" Ishki ister ministrliginiń baspasóz qyzmetine silteme jasap.
37 jastaǵy biznesmenniń áieli Qytaidyń Qazaqstandaǵy elshiligine júginip, kómek suraǵan. Áieldiń aitýynsha, oǵan belgisiz bireýler telefon shalyp, kúieýin urlap ketkenin habarlap, 400 myń iýan (22,5 million teńge) talap etipti.
"Qylmysty ashý maqsatynda Almaty qalasy politsiia departamentinde jedel-tergeý toby quryldy. Alǵashqy minýttardan bastap politseiler barlyq qajetti jedel jáne arnaiy is-sharalardy júrgizdi. Nátijesinde kúdiktilerdiń kim ekeni anyqtaldy" delingen habarlamada.
IIM aqparatynsha, sál keiinirek politsiianyń jedel qyzmetteri arnaiy bólinis jaýyngerlerimen urlanǵan adamdy qutqarý operatsiiasyn júrgizgen. Kúdiktiler ustalyp, qamaýǵa alyndy. Tergeý amaldary júrip jatyr. Qazir kúdiktilerdiń ózge qylmysqa qatysy bar-joǵy tekserilýde.
"Qazaqstan Úkimetine, Ishki ister ministrine, Almaty politseilerine meni qutqarǵany úshin úlken alǵysymdy aitamyn. Istiń osylai tez sheshilgenine qýanyshtymyn. Qytai elshiligine de alǵysymdy bildiremin. Qazaqstanǵa mindetti túrde taǵy kelemin. Munda adamdardyń qaýipsizdigi birinshi orynda turǵanyna kózim jetti", - dep rizashylyǵyn bildirdi biznesmen.
Qytaidyń Qazaqstandaǵy tótenshe jáne ókiletti elshisi Chjan Siao ishki ister ministrligine arnaiy kelip, ministr men barlyq politseige urlanǵan qytailyq biznesmendi qutqarǵany úshin alǵys aitty.
