Almatyda qurylys nysandaryna monitoring júrgizýdiń interaktivti kartasy jasalady. Bul QR Prezidentiniń tapsyrmasyna sáikes internet-resýrs geoportal bazasynda ázirlenetin bolady, dep habarlaidy "Ult aqparat".
Qalalyq josparlaý jáne ýrbanistika basqarmasynyń málimetinshe, interaktivti rejimde kóppáterli turǵyn úi keshenderi men jeke turǵyn úi qurylystary týraly aqparat alýǵa bolady.
Qazirgi kezde interaktivti kartany ázirleý úshin 94 kóppáterli turǵyn úi kesheni boiynsha aqparat jinaqtaldy.
Bazada myna málimetter bolady:
– jobanyń ataýy;
– qurylys nysanynyń túri, kóppáterli turǵyn kesheniniń nemese jeke úidiń qurylysy;
– kadastrlyq nómiri;
– kelisilgen eskizdik jobalar týraly málimet;
– AJT alǵandyǵy týraly málimet;
– qurylysty salýshynyń ataýy;
– qurylystyń bastalǵany jáne qashan iske qosylatyny týraly málimet;
– avtolyq/tehnikalyq qadaǵalaý;
– nysannyń qai aimaqta ornalasqany týraly málimet;
– qarjylandyrý kózi;
– qansha qabat;
– salynatyn alańy m2;
– ǵimarat sany;
– páter sany;
– qurylystyń barysy týraly fotosýretter.
Búginde interaktivti kartany toltyrý úshin jeke turǵyn úi qurylysy týraly aqparat jinalýda. Keiin málimetter bazasy ai saiyn onlain rejimde jańaryp otyratyn bolady.
Basqarma interaktivti kartanyń interfeisin rettep, olardy taqyryptar boiynsha qajetti málimettermen toltyrdy. Aqparatty jeńil ári tez qabyldaý úshin dizainy jasalyp jatyr. Sondai-aq barlyq nysandardyń «qurylys pasporty» jasalyp, olardy geoportaldan júkteý múmkindigi qamtamasyz etilgen.
Budan bólek, qurylysqa monitoring júrgizýdiń interaktivti kartasy jasaldy. Osynyń arqasynda azamattar men developerler qurylys qarqynyn mobildi qurylǵylar jáne kompiýterler arqyly baqylai alady.
Qabyldanatyn sheshimderdiń tiimdiligin arttyrý úshin jobalardy basqarý tetikteri engizilýde. Faildar men jobalyq qujattamalardy bir ortalyqta saqtaý úshin GantPro online-platformasy testilik rejimde jumysyn bastady. Jobalyq tásildi qoldaný «problemalyq» obektilerdi jedel anyqtaýǵa jáne shuǵyl sharalardy qoldanýǵa kómektesedi.
