Almatyda osy jyldyń kókteminde qurylys alańynda jumysshy áieldi zorlaǵan brigadirge qatysty sot úkim shyqty, dep habarlaidy QazAqparat.
Kináli dep tanylǵan J. esimdi azamatqa qatysty qylmystyq is Almaty qalasy Bostandyq aýdanynyń №2 aýdandyq sotynda qaraldy.
Biylǵy jyldyń naýryz aiynda aiyptalýshy J. jábirlenýshi A-ny kezdesýge shaqyrady.
Qurylys alańynda jumys isteitin ekeýi konteiner túrindegi úide kezdesip, ishimdik ishken, sodan keiin sottalýshy jábirlenýshini zorlaǵan.
Sottalýshy sotta óz kinásin moiyndaǵan joq. Jábirlenýshi sottan ony bas bostandyǵynan aiyrýdy surady. Al prokýror 7 jylǵa sottaýdy surady.
«Sot úkimimen J. kináli dep tanylyp, 5 jylǵa bas bostandyǵynan aiyryldy. Sot onyń buǵan deiin isti bolmaǵanyn jáne qart anasy men kámelet jasyna tolmaǵan balalary baryn eskerdi. Úkim zańdy kúshine engen joq», - dep habarlady aýdandyq sottyń baspasóz qyzmeti.
