Vaktsina alýǵa ótinish bildirgen almatylyqtardy QR Densaýlyq saqtaý ministrliginen vaktsinalar dozasynyń jańa partiiasy alynǵannan keiin kezekke sáikes vaktsinalaidy. Bul týraly qalalyq qoǵamdyq densaýlyq saqtaý basqarmasynyń ókili Laýra Myrzaǵali onlain brifing barysynda málim etti, dep habarlaidy "Ult aqparat".
«Qazir qaladaǵy emhanalar vaktsina saldyrýǵa nietti barlyq kelýshilerdi tirkeýge alyp, kezekke qoiyp jatyr. Búginde Almatyǵa 34 900 doza jetkizildi. Biz áli de basym topqa vaktsina egýdemiz. Atap aitar bolsaq, politsiia qyzmetkerleri, muǵalimder, dárigerler, múgedektermen jumys jasaityn áleýmettik qyzmetkerler. Halyq kóp jinalyp, uzyn-sonar kezek paida bolmas úshin men emhanalardan aldyn ala kezekke jazylyp alýlaryn suradym. Biraq bizde jappai vaktsinatsiialaý 9 sáýirden keiin bastalady», - dedi spiker.
Biylǵy jyldyń 1 aqpany men 5 sáýiri aralyǵynda 44 315 adamǵa ekpe salyndy. Onyń 6 200-i vaktsinanyń eki komponentin de alǵan.
«2-5 sáýir aralyǵynda 28 413 azamat vaktsina aldy. Ótken táýlikte 4 764 adam ekpe saldyrdy. 6 335 doza vaktsina qaldy, vaktsinatsiialaý barysy jalǵasýda. 9 sáýirde vaktsinanyń besinshi transhy kútilýde, Almatyǵa taǵy 57 445 doza jetkiziledi. Osy jyldyń 13 mamyrynda 57 445 doza jetkizý jospary bar», - deidi Laýra Myrzaǵali.
Vedomstvo ókili búginde infektsiialyq statsionarlarda 5610 tósek-oryn bolsa, 3114-inde naýqastar jatqanyn atap ótti. Onyń 87-si balalar, olardyń jaǵdaiyn dárigerler jeńil jáne ortasha jaǵdaida dep baǵalaýda. 77 eresek adamnyń jaǵdaiy asa aýyr, 570 adam aýyr jaǵdaida jáne 2467 naýqastyń jaǵdaiy ortasha aýyrlyq deńgeiinde.
