Almatyda koronavirýs indetin taralmaýyna jol bermeý maqsatynda jańa gospitaldiń irgetasy qalanyp jatyr. 1 aiǵa jetpei salynyp bitetin jańa nysannyń qurylysy qalai júrip jatqany jaily QazAqparat tilshisi bilip qaitty.
Aýdany 5850 sharshy metr bolatyn 280 orynǵa arnalǵan gospital Alataý aýdanynda salynyp jatyr. Qazir nysannyń irgetasy quiylyp, 1 blogynyń montaj jumystary júrip jatyr.
Qurylys 5 sáýirde bastalyp ketken.
«Biz modýldik bloktardan 280 orynǵa arnalǵan gospital qurylysyn bastadyq. Osy ýaqytta injenerlik jelilerdiń barlyǵy júrgizilip, aiaqtaldy. Irgetas quiylǵan. 1 bloktyń qabyrǵalary montajdalyp jatyr», - dedi BI Group Almaty kompaniiasynyń direktory Aidos Muqataev.
Negizgi qurylys materialdary - Reseiden. Qazir 5 modýldik blokty Atyraý arqyly temir jolmen ákele jatyr.
«Bir mobildi blok Almatyda bar bolǵan soń jedel satyp alyp, qurastyrýdamyz. Qalǵan 5 blok Atyraýdan kele jatyr. 25 sáýirde qurylysty aiaqtap, tapsyramyz», - dedi joba jetekshisi Arman Qabylhasov.
Muqataev Aidostyń aitýynsha, gospitaldyń basqa nysandardan aiyrmashylyǵy jeldetý júiesinde bolmaq.
«Ár boks jeldetý júiesimen qamtylady. Aýa tazartylady. Bokstarda teris qysym jasaý arqyly batsillalardyń dálizderge taralýyna kedergi jasalady. Mundaǵy maqsat - meditsinalyq personaldy infektsiiadan qorǵaý», - dedi ol.
Ǵimaratty 10 jyl paidalanýǵa bolady. Karantin merzimi aiaqtalǵan soń bul nysan ákimdikke beriledi. Ári qarai ony qai maqsatta paidalanýdy jergilikti bilik sheshedi.
Jyldam turǵyzylatyn ǵimarat 9 baldyq jer silkinisine tótep bere alady.
Almatydaǵy gospitaldiń Nur-Sultan jáne Shymkent qalalaryndaǵylardan aiyrmashylyǵy bar.
«Nur-Sultandaǵy ǵimarat mobildi emes, turaqty. Ondaǵy bokstar túgel zaýytta quiylady. Obektide tek qurastyrylady. Al Shymkentte bólmelerdi teńiz konteinerlerinen jasaý kózdelip otyr», - dedi A.Muqataev.
Aita keteiik, jańa gospital Alataý aýdanynda boi kóteredi. Sondai-aq, qalalyq Qoǵamdyq densaýlyq saqtaý basqarmasynyń basshysy Tileýhan Ábildaevqa osy jobany qolǵa alǵan kompaniia ókilderimen birlesip, gospitalǵa asa qajetti qural-jabdyqtar máselesin de pysyqtaý tapsyryldy.
Eske sala ketsek, qala ákimi merdiger kompaniia ókilderine qolǵa alǵan barlyq jumysty sapaly ári ýaqytynda bitirýdi júktegen edi.
Gospital salý týraly sheshimdi koronavirýs infektsiiasyna qarsy kúres maqsatynda qurylǵan QR Prezidenti janyndaǵy tótenshe jaǵdai rejimin qamtamasyz etý týraly Memlekettik komissiia qabyldaǵan bolatyn.
Epidemiologiialyq ahýaldy turaqtandyrýǵa yqpal etetin osyndai nysandar Almaty, Shymkent, Nur-Sultan qalalarynda salynady.
