Almatyda sońǵy eki táýlikte koronavirýs indetin 78 adam juqtyrdy. Keshe - 54, búgin - 24 jaǵdai anyqtaldy. Bul týraly qalalyq qoǵamdyq densaýlyq saqtaý basqarmasy málim etti, dep habarlaidy "Ult aqparat".
Qazirgi ýaqytta Almatyda koronavirýs infektsiiasyn juqtyrýdyń rastalǵan 756 jaǵdaiy tirkelgen.
«Onyń ishinde ortalyq qalalyq aýrýhananyń karantindegi 22 meditsina qyzmetkeri, №1 qalalyq klinikalyq aýrýhananyń provizorlyq statsionarynyń 2 qyzmetkeri, balalar qalalyq juqpaly aýrýlar aýrýhanasynyń 10 qyzmetkeri, 4 meditsinalyq jedel járdem qyzmetiniń 4 qyzmetkeri jáne virýs juqtyrǵan adammen bailanysta bolǵan 40 adam bar»,– dep habarlady basqarmadan.
Eki adamnyń jai-kúii óte aýyr, 24 adam – aýyr, 198 patsient - ortasha aýyr jaǵdaida. Qalǵan naýqastardyń jaǵdaiy birqalypty.
Qazirgi ýaqytta juqpaly aýrýlar statsionarlarynda 663 patsient emdelýde.
Provizorlyq ortalyqtarda - 440 adam, onyń ishinde 15 bala bar. Karantindik oqshaýlaýda – 421 (5 bala), úi karantininde – 10 093 azamat bar.
Búgingi kúnge deiin Almatyda 88 adam saýyǵyp, úiine shyqqan.
