Almaty kolledjderinde 73 myńnan astam stýdent bilim alýda. Bul týraly Almaty qalasy bilim basqarmasynyń basshysy Lázzat Jylqybaeva aitty, dep habarlaidy QazAqparat.
«Almatyda qazir 83 kolledj bar. Onyń 23-i memlekettik, 60-y jekemenshik. Barlyq kolledjderde «Ashyq» jumys isteidi, barlyq stýdentter 100% oflain oqidy», - dedi Lázzat Jylqybaeva.
Onyń aitýynsha, qaladaǵy kolledjderdiń barlyq qyzmetkerleri 100% vaktsinalandy. Tek 486 qyzmetkerdiń meditsinalyq kórsetilimi bolǵan soń, vaktsina salynbady.
«Kolledjderdiń ereksheligine qarai, stýdentter úshin ártúrli ýaqytta eki aptalyq qysqy demalys qarastyrylǵan, olar 10 qańtardan bastalady. Qysqy demalys qarsańynda kolledjderde qysqy kezeńdegi qaýipsizdik sharalary boiynsha túsindirý jumystary júrgizilýde. Júrgizilip jatqan jumys baqylaýǵa alynǵan», - dedi qalalyq bilim basqarmasynyń basshysy.
