Almatyda memleket jáne qoǵam qairatkeri Taijan Bolathannyń qurmetine memorialdyq taqta ashyldy, dep habarlaidy "Ult aqparat".
Taqtanyń ashylý saltanatyna qala ákiminiń orynbasary Erjan Babaqumarov, Bolathan Taijannyń jubaiy men uly, professor M. Súleimenov, diplomat H. Omarov, QazUTÝ prorektory Ý. Sydyqov jáne QR SIM ókildiginiń basshysy E. Ysqaqov qatysty.
Ákimniń orynbasary E. Babaqumarov óz sózinde qoǵam qairatkeri Bolathan Quljanulynyń qoǵamymyzdyń saiasi máselelerin qalyptastyrý men sheshýdegi mańyzdy rólin jáne onyń eńbegin memlekettiń joǵary baǵalaýyn atap ótti.
Almatyda Bolathan Taijan atyndaǵy kóshe bar. Endigi onyń esimin máńgi este qaldyrý maqsatynda memorialdyq taqta ashyldy. B.Taijan kóp jyldar boiy tótenshe jáne ókiletti elshi bolyp istegen, keiin Almatyda turdy.
«Men bul adam óz halqyna adal adam bolǵanyn aitqym keledi. Ol kadrlyq diplomat boldy, sol kezde de, qazir de mundai diplomattar az. Óz isin jaqsy biletin jáne Qazaqstan úshin kóp is jasaǵan adam edi. Óitkeni eń qiyn kezeń – el táýelsizdiginiń alǵashqy jyldary bolatyn. Alǵash ret bailanys ornatyp, jol salý kerek boldy jáne Bolathan qai jerde bolsa da bul jumysty óte jaqsy oryndady. Mysaly, Iemenniń konsýly bolsa da azamat soǵysy kezinde oq astynda, óz ómirin qaterge tigip, keńes azamattaryn parohodqa aparyp, eline jibergen. Mysyrdaǵy elshi bolǵan kezde Qazaqstandy álem moiyndaý úshin kóp kúsh jumsady, sondai-aq Egipette Abai atyndaǵy kósheniń ashylýyna qol jetkizdi. Al eń úlken jetistigi – onyń kómegimen Qazaqstan Islam Konferentsiiasy Uiymyna kirgeni, bul orasan zor eńbek. Ol maǵan konferentsiia jabylǵan sońǵy sátte Qazaqstandy osy qýatty, tanymal uiymnyń múshesi dep jariialaǵany týraly kóp aitqan edi», - dedi professor M.Súleimenov.
