Almatynyń bas sanitar dárigeri Jandarbek Bekshin kinoteatrlardy ashý máselesi talqylanyp jatqanyn málimdedi. Aitýynsha, barlyq sanitarlyq talap saqtalsa, kinoteatrlar kórermenniń 30%-in toltyryp jumys isteidi, dep habarlaidy Sputnik Qazaqstan.
Qazir kinoteatrlar men teatrlar onlain rejimde jumys istep tur.
"Teatrlar men kinoteatrlarǵa jumys isteýge ruqsat berý máselesi qarastyrylyp jatyr. Meditsinalyq betperde taǵý, araqashyqtyqty saqtaý, adamdardy kóp shoǵyrlandyrmaý talaptaryn oryndasa, bul nysandar jumys isteidi", - dedi ol.
Aitýynsha, qazir kinoteatrlardyń 30%-in toltyryp ashý boiynsha usynystar aitylyp jatyr. Ol jerdegi qaýipsizdikti kinoteatrdyń ákimshiligi qadaǵalaidy.
"Qazir kinozaldyń 30%-ine deiin kórermen qabyldaý máselesi qarastyrylyp jatyr. Árqaisysy zaldyń keskindemesine qarai kórermenderdi qalai otyrǵyzýǵa bolatynyn naqtylaidy. Ol shahmat sekildi otyrǵyzylýy múmkin nemese kórshi oryndyq arasynda bir metr araqashyqtyqty saqtap otyrǵyzylady. Ár kinoteatr óziniń yńǵaiyna qarai osyndai usynystar aityp jatyr. Eger barlyq talap saqtalatyn bolsa, onda kinoteatrdyń jumysyna ruqsat beriledi", - dedi Jandarbek Bekshin.
Sonymen qatar demalys kúnderi Almaty mańyndaǵy eldi mekenderge elektrichkalar qatynaidy.
"Bul másele baqylaýda tur. Juqpaly aýrýdy taratatyn eń aldymen, qoǵamdyq kólik pen jabyq nysandar. Qazir eldi mekender arasynda júretin elektrichkalardy ashyp jatyrmyz. Almaty – Uzynaǵash, Almaty – Qaskeleń baǵytyndaǵy elektrichkalar demalys kúnderi de, jumys kúnderi de júredi", - dedi Bekshin.
