Almatyda kóshelerge Kenesary han, Ázilhan Nurshaiyqov, Jumeken Nájimedenov, Qadyr Myrza Áli, Tumanbai Moldaǵaliev, Shyńǵys Aitmatov, Gerold Belger, Talǵat Bigeldinov, Ermek Serkebaev, Sháken Niiazbekov syndy qazaq tarihy, ádebieti, mádenietimen bailanysy bar tanymal tulǵalardyń esimderi beriledi, dep habarlaidy "Ult aqparat".
Almaty ákimdiginiń habarlaýynsha, megapoliste 42 kóshege elimizdiń damýyna úles qosqan qairatkerler esimi beriledi, qalǵandary geografiialyq ataýǵa, qazaqstannyń tarihy men mádenietine, dástúrine orai atalatyn bolady.
«Sh.Aitmatov, G.Belger, T.Bigeldinov, E.Serkebaev, Q.Kenjetaev, S.Kalmykov, Q.Myrza Áli, Almaty aportynyń «ákesi» atanǵan E.Redko jáne basqalardyń esimderin alǵan kósheler paida bolady», delingen ákimdik habarlamasynda.
Eske salsaq, Almatyda buryndary birin-biri qaitalaityn 100 kóshe ataýy ózgergen bolatyn. Qalaǵa qosylǵan eldi mekenderdi eseptegende megapoliste Abai atynda - 12. M. Áýezov atynda - 3, J. Jabaev atynda - 13, Qurmanǵazy atynda - 6, Tóle bi atynda - 5, Qazybek bi atynda - 3, Áiteke bi atynda - 3, Raiymbek batyr atynda - 8, Naýryzbai batyr atynda - 4, Qarasai batyr atynda - 8, Baitursynov atynda - 4, S. Seifýllin atynda - 5, Á. Moldaǵulova atynda - 6, M. Mámetova atynda 6 kóshe atalǵan eken.
Qalalyq ákimdiktiń habarlaýynsha memlekettik organdar bazada kóshe ataýy ózgergen soń qajetti anyqtamalardy elektrondy úkimet portalynyn nemese HQKO-dan birneshe minýt ishinde ala alady.
Eske salaiyq, búgin, 30 qarashada Almatydaǵy Fýrmanov kóshesi Nazarbaev dańǵyly bolyp ózgerdi.
