Almatyda qarý-jaraq dúkenin tonaýǵa qatysqan taǵy úsh kúdikti ustaldy, dep habarlaidy QazAqparat.
Politsiia departamentiniń málimetinshe, Almatyda qarý-jaraq dúkenderin tonaýǵa qatysýshylardy ustaý boiynsha eki arnaiy is-shara júrgizildi.
Nátijesinde úsh kúdikti qamaýǵa alyndy.
Urlanǵan qarýdyń bir bóligi «Dostyq» shaǵyn aýdanyndaǵy úilerdiń birinde, al ekinshisi – Almaty oblysy, Qarasai aýdany aýmaǵyndaǵy Jambyl eldi mekenindegi úilerdiń birinen tabyldy jáne tárkilendi.
«Eki kúdikti 25 jasta, bireýi 27-de. 5 qańtarǵa qaraǵan túni olar «Kamerad» ańshylyq dúkenin tonap ketken. Jas jigitter urlanǵan zattardy úidiń jertólesine tyǵyp, ústine qum basyp ketken. Ártúrli markadaǵy tórt tegis uńǵyly myltyq, avtomat, 720 patron, bes ańshylyq pyshaq, arbalet, optikalyq kózdeýish jáne oq-dári tárkilendi jáne qylmystyq is materialdaryna tirkeldi. Kúdiktiler kinásin moiyndap, dúkenge qalai kirgenderin aityp berdi», – dedi Almaty qalalyq politsiia departamenti bastyǵynyń orynbasary Berik Ábilbekov.
Tergeýshiler «úshtiktiń» osyǵan uqsas qylmystarǵa qatysy bar-joǵyn anyqtaýda.
Qylmystyq is QR QK-niń 291-baby 3-bóligi (Qarýdy, oq-dárilerdi, jarylǵysh zattardy urlaý) boiynsha tergelip jatyr.
Bul baptyń sanktsiiasynda bes jyldan on eki jylǵa deiingi merzimge bas bostandyǵynan aiyrý kózdelgen.
