Almatyda 25 mamyrda qoǵamdyq tamaqtaný oryndary jumysyn qaita bastaidy, dep habarlaidy QazAqparat.
Qalalyq kásipkerlik jáne investitsiialar basqarmasynyń habarlaýynsha, qalada qoǵamdyq tamaqtaný salasynda 3100 kásiporyn tirkelgen. Onda 27 myń adam jumys isteidi.
«Bul kásiporyn basshylaryna qoiylatyn basty shart – kelýshilerdiń arasyndaǵy qashyqtyqty qamtamasyz etý. Bir ústelge bir otbasydan 4 adamnan artyq otyrǵyzýǵa tyiym salynady. Bul nysandar túngi 23:00 deiin jumys isteýge quqyly. Birinshi kezeńde banketter men toi jasaýǵa tyiym salynady. Osy tamaqtaný nysandarynyń ishinde karaoke, biliard, kalian ortalyqtarynyń jumys isteýine tyiym salynǵan», - dedi basqarmadan.
Ákimdik qalada burynǵydai karantin sharalary jalǵasatynyn eskertti.
Saýda, qoǵamdyq tamaqtandyrý, sondai-aq qonaqúi nysandarynyń jumysy barlyq sanitariialyq-epidemiologiialyq talaptar saqtalǵan jaǵdaida múmkin bolady.
Sonymen birge, Almatyda alańy 2000 sharshy metrden astam iri saýda nysandaryn (megapoliste mundai nysandar - 64) mindetti nysandardyń daiyndyǵyn baǵalaǵannan keiin ǵana ashýǵa bolady. Aýdit ótkizýge beriletin tapsyrys kún saiyn call-ortalyq, sondai-aq elektrondy poshta arqyly qabyldanady.
Qalǵan saýda, qoǵamdyq tamaqtandyrý jáne qonaqúi nysandaryna qoiylǵan shekteýlerdi daiyndyq baǵalaýyn ótkizbei-aq jumysyn bastasa bolady. Olar eń aldymen Almaty qalasynyń bas memlekettik sanitarlyq dárigeriniń infoalmaty.kz saityndaǵy qaýlysynyń erejelerimen tanysyp, ekinshiden – nysannyń ereje talaptaryna sáikes daiyndyǵy, onyń qatarynda mindetti áleýmettik qashyqtyq, jumys oryndaryndaǵy qatań sanitarlyq rejim saqtalǵan jaǵdaida ǵana jumysyn bastai alady. Daiyndyq aiaqtalǵannan keiin – infoalmaty.kz saityna tirkeledi jáne nysan erejeniń talaptaryna sáikes daiyn ekenin rastaidy, sondai-aq kásiporyndarda elektrondyq tsifrlyq qol qoiylǵan habarlamaǵa qol qoiý arqyly bekitilgen normalardyń saqtalýyna kepildik beredi.
Jumys oryndaryna tikelei qajetti jumysshylar sanyn atalǵan uiym basshylary ózderi belgileidi.
Qyzmetine ruqsat berilgen uiymdardyń oblysta turatyn qyzmetkerlerine qalaǵa kirip-shyǵýǵa ruqsat beriledi. Qalaǵa kirýdiń mindetti sharty - qyzmetkerlerdiń derekterin infoalmaty.kz bazasyna engizý. Tirkeý nysandar jumysqa ruqsat alǵannan keiin múmkin bolady.
