Almatynyń monitoring toby eki kúnde karantin talabyn buzǵan 26 mekemeni anyqtady, dep habarlaidy QazAqparat.
Monitoring tobynyń málimetinshe, Almatynyń kóńil kóterý mekemelerinde áli de jumys rejimin buzatyndar bar, qonaqtardy otyrǵyzý kezinde áleýmettik qashyqtyq saqtalmaidy, qyzmetkerler maska taqpaidy.
Almatydaǵy qoǵamdyq tamaqtaný oryndary men kompiýterlik klýbtarǵa júrgizilgen eki kúndik tekserýdiń qorytyndysy osyndai.
«Demalys kúnderi qalada tekserý kúsheitildi, kásipkerlik obektileri boiynsha 26 zań buzýshylyq anyqtaldy. Quqyq buzýshylar tiziminde: Raiymbek dańǵylyndaǵy «Street Bar», «Ainur» kafesi, «Grand Opera» kesheni, T-Bar laýndj-bary, «Miata na Seifýllina» laýndj bary jáne «Night Star» kafesi bar»,- dep habarlady monitoring top ókilderi.
13-19 qyrkúiek aralyǵynda karantin sharalaryn buzǵan 166 mekeme anyqtaldy. 19 zańdy tulǵaǵa 6 373 645 teńgege 141 hattama toltyryldy. Sonymen qatar, maska rejimin buzǵany úshin 122 adamǵa 5 425 620 teńge kóleminde aiyppul salyndy.
Almaty qalasynyń sanitarlyq-epidemiologiialyq baqylaý departamenti jyl basynan beri monitoring toptarynyń 39 972 nysandy teksergenin, onyń 3 814 -de karantinniń túrli buzýshylyqtary anyqtalǵanyn naqtylady. Jalpy somasy 461 mln teńgeden asatyn 5 988 hattama jasaldy.
Sanitarlyq dárigerler, jergilikti atqarýshy organdar men politsiia qyzmetkerleri megapolis turǵyndaryn halyq kóp jinalatyn merekelik sharalardan bas tartýǵa shaqyrady. Barlyq usynystarǵa jaýapkershilikpen qaraý qaýipti infektsiianyń taralýyn azaitýǵa kómektesedi.
Aýrýdyń jańa órshýine jol bermeý úshin sanitarlyq-epidemiologiialyq erejelerdi saqtaý, koronavirýsqa qarsy vaktsinatsiiany saldyrý, betperde taǵý, adamdar kóp jinalatyn jerlerge barmaý, qoldy jii jýý qajet.
