Almatyda 17 aýrýhana ortalyqtandyrylǵan ottegi berý qurylǵysyna qosylǵan. Bul týraly Almaty ákimi Baqytjan Saǵyntaev onlain brifingte aitty, dep habarlaidy QazAqparat tilshisi.
Shahar basshysy byltyr aýrýhanalarda ottegi berý boiynsha biraz másele bolǵanyn atap ótti.
«Almatydaǵy 17 aýrýhana ortalyqtandyrylǵan ottegi berý qurylǵysyna qosylǵan. Byltyr kúz mezgilinde ony sheshtik. Ár palatada, ár tósek-oryn ottegi berý apparatyna qosylǵan. Qazir kez kelgen palatany reanimatsiiaǵa ainaldyrýǵa bolady. Bul jumystyń bári qysqa merzimde atqaryldy. Sondyqtan bul másele boiynsha eshqandai problema joq»,-dedi ákim.
Keshe koronavirýs infektsiiasynyń 595 jańa jaǵdaiy tirkelgen.
Onyń 497-inde - koronavirýs infektsiiasynyń belgisi bar jáne 98-i simptomsyz pnevmoniia.
Aita keteiik, Almaty 10 naýryzdan beri «qyzyl» aimaqta. Karantin sharalary 12 sáýirge deiin uzartyldy.
