Foto: Almaty ákimdigi
Almatyda 19 qyrkúiekte ótetin Backstreet Boys kontsertine daiyndyq qyzý júrip jatyr, dep habarlaidy Ult.kz.
Kúzdiń eń iri mádeni oqiǵalarynyń biri bolatyn bul sharaǵa shamamen 27 myń kórermen jinalady dep kútilýde. Osyǵan orai qala ákiminiń orynbasary Azamat Qaldybekovtiń tóraǵalyǵymen Ortalyq stadionda arnaiy jiyn ótti.
Jiynǵa politsiia, TJD, jedel járdem, kommýnaldyq qyzmet ókilderi, sondai-aq qala basqarmalary men qurylymdyq bólimshelerdiń jetekshileri qatysty. Kún tártibinde qaýipsizdik, sanitariia, logistika jáne tehnikalyq jabdyqtaý máseleleri qaraldy.
Kontsert kezinde tártipti qadaǵalaý úshin 2100-den astam politsiia qyzmetkeri, 500 ulttyq gvardiia áskeri jáne 200 kúzetshi jumyldyrylady. Is-shara aldynda kinologtar aýmaqty tekserip, injenerlik jelilerdi baqylaýdan ótkizedi. Kórermender metall izdegish ramalar men skanerler arqyly kirgiziledi.
– Abai dańǵyly ýaqytsha jabylady, kólik keptelisiniń aldyn alý úshin arnaiy «zmeika» túrindegi týrniketter qoiylady. Sonymen qatar alypsatarlyq pen zańsyz aktsiialarǵa qarsy kúres sharalary kúsheitiledi, naqty algoritm daiyn, – dedi ákimniń orynbasary Azamat Qaldybekov.
Ol sonymen qatar meditsinalyq jáne órt qaýipsizdigin qamtamasyz etýdi tapsyrdy: stadionda jedel járdem kólikteri men órt sóndirý brigadalary kezekshilik etedi, evakýatsiialyq jospar ázirlengen. Sanitarlyq talaptarǵa da basa mán berilip, aýmaqty kún saiyn tazalaý, bioóńdeý júrgizý jáne sanitaizerler ornatý mindetteldi.
Jiynda eriktilerdiń jumysyna da arnaiy toqtaldy. Qalalyq jastar saiasaty basqarmasynyń basshysy Aziz Qajdenbektiń aitýynsha, kontsertke 150 erikti tartylady. Olar tek 18 jastan asqan jastardan irikteledi, árqaisysyna tegin tamaqtaný talondary beriledi.
Kontsertti uiymdastyrýshy First Media Group kompaniiasynyń basqarýshy seriktesi Alfiia Nurǵumarova aldyńǵy tájiribege súiene otyryp, jańa sharalar qabyldanǵanyn atap ótti:
– Djennifer Lopestiń kontserti bizge úlken sabaq boldy. Osy joly qaýipsizdik kúsheitilip, jańashyldyqtar engiziledi. Biletterdi tekseretin qyzmetkerler sany 100-den 150-ge artty. Stadion aýmaǵyna qosymsha beinekameralar ornatylyp, alaiaqtyq áreketterdi habarlaý úshin senim telefony iske qosylady, nómiri LED-ekrandarda kórsetiledi. Volonterler sany da kóbeitildi. Budan bólek, fýd-kort aimaqtary keńeiip, kórermenderge tegin sý taratylady, – dedi ol.
Sondai-aq, ártisterge barlyq jaǵdai jasalady: arnaiy grim bólmeleri bar shatyrly qalashyq ornatylady. Meet & Greet jankúierlermen kezdesý qarastyrylmaǵanymen, stadion mańynda toptyń resmi merch ónimderi satylatyn úsh dúńgirshek jumys isteidi.
Almaty mádeni is-sharalardy uiymdastyrýda jańa deńgeige kóterilýde: qala «A» sanatyndaǵy kontsertter ótetin alańǵa ainalyp, olardy ótkizýdiń jańa standarttaryn qalyptastyrýda — basty nazar qaýipsizdikke, kórermenderdiń jailylyǵyna jáne uiymdastyrý sapasyna aýdarylýda.
Aita keteiik, Backstreet Boys kontserti Almaty kúnine orai uiymdastyrylyp otyr. Bul mereke jyl saiyn qyrkúiektiń úshinshi jeksenbisinde atalyp ótedi, biyl ol 21 qyrkúiekke sáikes keledi.
