Almaty ákimi Baqytjan Saǵyntaev qalanyń Almaly aýdanynda IT jáne kreativti hab qurylatynyn aitty, dep habarlaidy "Ult aqparat".
«Aqparattyq tehnologiia men kreativti indýstriiaǵa basymdyq bere otyryp, qala ekonomikasynda «qurylymdyq manevrdi» damytý úshin infraqurylymdyq jobalardy júzege asyrmaqpyz. Buǵan jeke kapital da qatystyrylady. Búgin Almaly aýdanynda IT jáne kreativti hab jobasynyń iske asyrylý barysymen tanystym. Investor Jambyl Revshanov tehnologiialyq kreativti kompaniialar úshin aýdany 9 myń jáne 4 myń sharshy metr ONE Academie Informatique bilim ortalyǵy úshin keńse keńistiginiń qurylysyn júrgizýde»,– dep jazdy Baqytjan Saǵyntaev Instagram paraqshasynda.
Bilim ortalyǵynyń jobasy frantsýz baǵdarlamashysy, pedagog Nikolia Sadirak jáne 01 educational platform-men yntymaqtastyqta júzege asady.
«Onyń biregeiligi sol, baǵdarlamalaý, derekterdi taldaý, mashinalyq oqytý algoritmderi, kiberqaýipsizdik, qosymshalardy ázirleý oqytýshysyz jáne dárissiz júrgiziledi. Jasóspirimder praktikalyq máselelerdi sheshýmen qatar, IT negizderin ózdiginen úirenip, bul salaǵa endi kelgenderge kómektesedi. 1,5-2 jyldyń ishinde 18-42 jas aralyǵyndaǵy 800-ge jýyq maman daiarlaý josparlanyp otyr» dep atap ótti qala basshysy.
