Almatyda iesiz qalǵan 95 shaqyrym ózen arnasy anyqtaldy, dep habarlaidy QazAqparat.
«Qaladaǵy barlyq sý obektilerine túgendeý júrgizildi. Iesiz qalǵan 95 shaqyrym ózen arnalary anyqtaldy. Olar boiynsha arnalardy nyǵaitý, keibir ýchaskelerdi keńeitý, sý basýdyń problemalyq oryndaryn boldyrmaý jáne t. b. boiynsha usynystar berildi»,– dedi Almaty qalalyq jasyl ekonomika basqarmasynyń basshysy Natalia Livinskaia.
Onyń aitýynsha, megopolis aýmaǵynda 26 ózen bar, olardyń jalpy uzyndyǵy 315 shaqyrymdy quraidy.
«2019 jyly ál-Farabi dańǵylynan Jamaqaev kóshesine deiingi Esentai ózeniniń sý qorǵaý beldeýi men arnasyn, sondai-aq qala shegindegi Úlken jáne Kishi Qarasý ózenderiniń sý qorǵaý beldeýleri men arnalarynyń jekelegen ýchaskelerin rekonstrýktsiialaý aiaqtaldy», – deidi spiker.
Biyl «Jumyspen qamtý jol kartasy» memlekettik baǵdarlamasy sheńberinde jalpy uzyndyǵy 21,6 shaqyrym bolatyn Almaty, Tiksai, Jarbulaq, Esentai ózenderiniń arnalaryn rekonstrýktsiialaý jáne abattandyrý boiynsha jumystar júrgizilýde.
