Almaty qalasynyń ákimdigi men Politsiia departamenti birlesip aýyr júk kólikterin, arnaiy jáne qurylys tehnikasyn gaz shyǵaryndylaryna tekserýdi kúsheitti. Bul sharalar megapolistiń ekologiialyq ahýalyn jaqsartý maqsatynda qabyldandy, dep habarlaidy QazAqparat.
Qalalyq jasyl ekonomika basqarmasynyń basshysy Natalia Livinskaianyń aitýynsha, Almatyda 2020 jyly táýligine 34 myń aýyr júk kóligi tirkelgen. Byltyr pandemiia kezinde aýyr júk kóliginiń júrgizýshilerine qalanyń joǵarǵy bóliginde, Raiymbek batyr dańǵylynan joǵary júrýine múmkindik beretin ruqsat qaǵazdar berildi. 2020 jyly barlyǵy 1620 propýsk-ruqsat qaǵazy berilgen.
«Bizdiń baqylaýymyz boiynsha, 2021 jyldyń ishinde lastaný dinamikasynyń tómendegenin baiqamadyq.Osyǵan bailanysty biz tehnikalyq jabdyqtalýy ekologiialyq normalarǵa sáikes kelmeitin, aýyr júk kólikteriniń sanyn qysqartý týraly sheshim qabyldadyq. Biz shyǵaryndylaryndaǵy ýlylyq normasyn ólsheitin jyljymaly ekologiialyq patrýldi iske qostyq. Ár júk kóligi mindetti túrde ekologiialyq post arqyly attestattaýdan ótýi kerek. Ýlylyq normasy artqan jaǵdaida aiyppul salynyp, ruqsat qaǵazy qaitaryp alynady. Sodan keiin kólik jabdyǵyn aýystyrý úshin óndiristik bazaǵa jiberiletin bolady», - dep atap ótti N.Livinskaia.
Birinshi kezekte, aýyr júk kólikteri jańartylatyn bolady. Tek sodan keiin ǵana ruqsat qaǵazdary beriledi.
Tranzit júk kólikterine qatysty Almatynyń Politsiia departamenti jáne jasyl ekonomika basqarmasy birlesip arnaiy qozǵalys baǵytyn ázirleidi.
Osylaisha, qalada ekologiialyq normalarǵa sáikes keletin júk kólikteri ǵana júretin bolady. Qalanyń joǵarǵy bóliginde táýligine shamamen 500 - 600 júk kólikteri júredi dep josparlanýda.
