Almatyda sáýirde «Bastaý Biznes» jobasy boiynsha jas kásipkerlerge 1 000 grant beriledi. Bul týraly onlain brifing barysynda Almaty qalasy Kásipkerler palatasynyń direktory Aitýar Qoshmambetov aitty, dep habarlaidy QazAqparat.
Atalǵan joba boiynsha oqytý sáýirde bastalady. Biyldyń ózinde 2000 adamdy oqytý josparlanǵan.
«Bastaý Biznes» jobasyn iske asyrý biyl da jalǵasady. Sondai-aq, 200 AEK (583 400) teńge mólsherinde 1 000 grant qarastyrylǵan. Joba biyl sáýirde bastalady», - dedi A.Qoshmambetov. Biylǵy oqytý koronovirýstyq infektsiiany taratpaý boiynsha qabyldanǵan sharalarǵa bailanysty 2020 jyldaǵydai atamekenacademy platformasynda onlain rejiminde júrgiziledi.
Aita ketý kerek, Almaty qalasynda «Bastaý Biznes» jobasy 2019 jyldan bastap «Eńbek» nátijeli jumyspen qamtý jáne jappai kásipkerlikti damytýdyń 2017 – 2021 jyldarǵa arnalǵan baǵdarlamasynyń ekinshi baǵyty sheńberinde iske asyp keledi.
«Atameken» QR UKP qarjylyq emes qoldaý operatory bolyp tabylady, Baǵdarlama sheńberinde oqýǵa úmitkerler tiziminen «Bastaý Biznes» jobasy boiynsha qatysýshylardy oqytýdy uiymdastyrady.
Jalpy, Almaty qalasynda 2017-2021 jyldarǵa arnalǵan «Eńbek» nátijeli jumyspen qamtý jáne jappai kásipkerlikti damytý memlekettik baǵdarlamasy aiasynda 2019-2020 jyldary kásipkerlik negizderi boiynsha 9 500 qatysýshy oqyǵan. Onyń ishinde 4 572 túlek óz startapyn iske asyrýǵa 200 AEK mólsherinde memlekettik grant alǵan.
