Almatyda «Baqytty otbasy» ortalyqtary ákelerge de kómek kórsetedi. Bul týraly «Baqytty otbasy» qalalyq ortalyǵynyń basshysy Zúlfiia Baisaqova onlain brifingide aitty, dep habarlaidy QazAqparat.
Almatyda az qamtylǵan otbasylarǵa jan-jaqty kómek kórsetý maqsatynda, 2019 jyldan beri qalanyń ár aýdanynda «bir tereze» qaǵidaty boiynsha «Baqytty Otbasy» ortalyqtary jumys atqaryp keledi. Búgingi kúni qalanyń ár aýdanynda 9 ortalyq jumys istep tur.
Almatydaǵy «Baqytty otbasy» áleýmettik ortalyǵy biyldan bastap jańa formatta jumysyn bastady. Budan bylai, kópke qol ushyn berip júrgen mamandar endi tek analar men az qamtylǵan otbasylarǵa ǵana emes, úide eki qolǵa bir kúrek tappai otyrǵan ákelerge de óz jobalaryn usynbaq.
«Bizdiń ortalyqtar erler úshin avtosalonǵa arnalǵan qaptar tigý men kishkentai balalarǵa arnalǵan massaj kýrstaryn uiymdastyryp otyr. Bul salaǵa qyzyǵýshylyq tanytqandar sany kún sanap artyp keledi. Ortalyq mamandary, olardy tegin oqytyp, keiinnen kásibin bastaý úshin memleketten grant alýyna kómektesedi. Aita keteiik, ótken jyly aýdandaǵy 1705 adam qaitarymsyz grant alyp, búginde shaǵyn kásibin júrgizip otyr»,-deidi Zúlfiia Baisaqova.
Ortalyqtyń maqsaty - Almaty qalasynda turatyn áleýmettik osal otbasylardyń ómir súrý sapasyn jaqsartyp, ekonomikalyq táýelsizdigin nyǵaityp qana qoimai, sonymen qatar ómirlik qiyn jaǵdaidan shyǵýlary úshin jeke motivatsiialaryn nyǵaitý.
