Almatyda 27 aqpan kúni Seifýllin dańǵyly men Maqataev kóshesiniń qiylysynda avtobýs qaǵyp ketken áielderdiń biri qaitys boldy, dep habarlaidy QazAqparat tilshisi.
«Ótken senbi kúni jaiaý júrginshiler jolynda qoǵamdyq kólik qaǵyp ketken 1963 jyly týǵan áiel túnde qaitys boldy» - dep habarlady qoǵamdyq densaýlyq saqtaý basqarmasynyń baspasóz qyzmeti.
Eske sala keteiik, 27 aqpan kúni keshki saǵat 20:00 shamasynda Seifýllin dańǵyly men Maqataev kóshesiniń qiylysynda «Mega Park» saýda oiyn-saýyq ortalyǵynyń janynda avtobýs pen birneshe jeńil kólik soqtyǵysqan bolatyn.
Jol-kólik apatynan bes adam zardap shekti.
Úsheýi jedel meditsinalyq járdem aýrýhanasyna, bireýi ortalyq qalalyq klinikalyq aýrýhanaǵa, taǵy bireýi kópsalaly klinikalyq aýrýhanaǵa jetkizildi.
Olardyń jaǵdaiy ortasha aýyr dep baǵalanǵan.
Aldyn ala boljam boiynsha, avtobýs júrgizýshisi kenetten ózin nashar sezinip, sonyń saldarynan rólge ie bola almai qalǵan.
