©️ qaz365.kz
Qazaqstan boks federatsiiasynyń baspasóz qyzmeti Instagram-paraqshasynda tanymal qazaqstandyq boksshy, KSRO-nyń eńbek sińirgen sport sheberi, Eýropa chempiony Serik Nurqazovtyń joǵalyp ketkeni týraly jazba bólisti, - dep habarlaidy Tengrinews.kz saity.
"Qoǵam" jasaǵynyń eriktileri jariialaǵan derekke sáikes, 14 jeltoqsanda Almatyda 64 jastaǵy er adam joǵalyp ketken.
"Nurqazov Serik, 10.04.1959 jyly týǵan. 14 jeltoqsanda Lýganskogo kóshesi mekenjaiyndaǵy úiden belgisiz baǵytta shyǵyp ketken, búgingi kúnge deiin onyń qaida ekeni belgisiz.
Kiim: sur qalpaq, kapiýshony bar kók kúrte, aq vodolazka, qara djinsy shalbar.
Joǵalǵan adam týraly málimet biletinder +7 702 712 79 22 nemese @kogam_almatý-ǵa habarlasý suralady", - delingen jazbada.
Aita keteiik, Serik Nurqazov 1980 jyldary KSRO quramasynda bolǵan. Ol - 1981 jyly Tamperede ótken Eýropa chempionatynyń qola júldegeri, 1983 jyly Rimde ótken álem chempionatynyń kúmis júldegeri, 1983 jyly Varnada ótken Eýropa chempiony, Qazaqstan men KSRO-nyń birneshe dúrkin chempiony. 1984 jyly "Úzdik boksshy" ataǵy berildi.
