Almatyda metsenattardy qoldaý maqsatynda tórtinshi ret ótkizilgen «Jomart júrek» baiqaýynyń laýreattary marapattaldy, dep habarlaidy QazAqparat.
Búgin Almatyda jyl saiynǵy «Jomart júrek» baiqaýynyń qorytyndysy shyǵaryldy. «Jomart júrek» baiqaýy Qazaqstan Respýblikasynyń Tuńǵysh Prezidenti – Elbasy Nursultan Nazarbaevtyń «Rýhani jaǵyrý» baǵdarlamasy aiasynda quryldy jáne Memleket basshysy Qasym-Jomart Toqaev alǵa qoiǵan kásipkerler men jeke tulǵalardyń qaiyrymdylyq jobalaryna qatysýlaryn janama yntalandyrý tetikterin engizý máselesin sheshýge múmkindik beredi.
Baiqaýdyń basty maqsaty — eń jarqyn jáne mańyzdy qoǵamdyq bastamalardyń oń tájiribesin dáripteý arqyly qaiyrymdylyq jasaýdy yntalandyrý jáne damytý.
Almaty ákiminiń orynbasary Erjan Babaqumarov baiqaýdyń laýreattaryn marapattap, halyqtyń ál-aýqatyn jaqsartýǵa jáne qalanyń gúldenýine qosqan úlesteri úshin alǵysyn bildirdi.
Biyl Almatyda qalanyń infraqurylymyn abattandyrý men jaqsartý boiynsha iri áleýmettik jobalar júzege asyryldy. Almatynyń metsenattary túrli baǵyttar – bilim, sport, mádeniet boiynsha barynsha aýqymdy qaiyrymdylyq sharasyn júzege asyrdy.
Syilyqtar bes nominatsiia boiynsha tabystaldy.
Baiqaýdyń jeńimpazdary:
Jyl tulǵasy - belsendi qaiyrymdylyq qyzmeti úshin – Syrymbek Taý, «Daco Motors KZ» JShS bas direktory. Metsenat 8 500 otbasyǵa azyq-túlik sebetteri men meditsinalyq qyzmetkerlermen qamtamasyz etý arqyly kómektesti. Naýqas balalarǵa arnalǵan ońaltý ortalyǵynyń qurylysyna 20 million teńge bóldi. «Mektepke jol» baǵdarlamasy aiasynda 100 balaǵa oqý quraldaryn, 10 planshet pen 5 noýtbýk alyp berdi. Úsh otbasynyń turǵyn úi satyp alý úshin bastapqy tóleminiń 30%-yn tóledi, balalar úiine, «Saýran», «Alataý» qaiyrymdylyq qorlaryna kómek kórsetedi.
Jyl metsenaty – belsendi metsenattyq qyzmeti úshin – Dolkýntai Abdýlhalil, «METALL PROM GROUP» JShS direktory. Kompaniia ómirlik qiyn jaǵdaiǵa tap bolǵan 5 myń otbasyǵa azyq-túlik sebetteri túrinde kómek kórsetti. Ol Almatydaǵy jas sportshylarǵa jáne birqatar sport klýbtaryna demeýshilik jasaidy. Jasóspirimder arasyndaǵy respýblikalyq jarystardy uiymdastyrýǵa demeýshilik kórsetti. Dolkýntai Abdýlhalil biyl qaiyrymdylyqqa barlyǵy 88,7 mln tg bóldi.
Týǵan ólke – kishi otandy qoldaý boiynsha áleýmettik mańyzy bar jobalardy júzege asyrǵany úshin – Muhamethan Sabyrjan. Ol 4 balalar sport alańynyń qurylysyna demeýshilik jasady, muqtaj otbasylarǵa úilerin jóndeýge 4 mln tg kóleminde kómek kórsetti.
Jyldyń úzdik uiymy – qaiyrymdylyq baǵdarlamasyn tiimdi iske asyrý úshin – JShS «BAZIS-A Corp». Kompaniia Bostandyq aýdanyndaǵy №146 mektepke 300 balaǵa arnalǵan qosalqy korpýsty óz qarjysyna saldy. Kásiporyn №65 mektep aýmaǵynda 300 oryndy korpýs salýdy josparlap otyr.
Jyldyń úzdik qamqorshysy – áleýmettik mańyzdy ózgerister men túrlendirý boiynsha qaiyrymdylyq kómegi úshin – «Kometa» JShS. Kompaniia qaiyrymdylyq sharalaryna qatysty, múmkindigi shekteýli balalarǵa kómek kórsetedi, mobildi aýrýhanalarǵa sý jetkizýge demeýshilik kómek retinde 10 mln qarjy bóldi. Olar №1 balalar úiine, «Januia» arnaiy keshenine, №123, 149 balabaqshalarǵa jáne pediatriianyń ǵylymi ortalyǵyna únemi kómek kórsetedi.
«Bizdiń kompaniia qaiyrymdylyqpen 10 jyl boiyna ainalysyp keledi. Biz balalar úiine kómektesemiz, interaktivti taqtalar, oqý oiyndary men kitaptar satyp aldyq, balalarǵa arnalǵan tegin sport zalyn ashtyq, otbasylarǵa úi salýǵa kómektestik. Bul marapat men úshin úlken motivatsiia. Joǵary baǵa qalaǵa, bizdiń turǵyndarǵa kómektesýge degen umtylysty odan ári arttyrady», — dedi Dolkýntai Abdýlhalil.
Aita keterligi, metsenattar megapolis pen onyń turǵyndaryna turaqty túrde kómek kórsetedi. Demek, uiymdastyrýshylar atap ótkendei, mundai is-sharalar biznes-qurylymdardyń, metsenattardyń, úkimettik emes uiymdardyń ókilderi men eriktilerdi jaqsy ister jasaýǵa yntalandyrady jáne meiirimdilik ideiasyn nasihattaidy.
