Almatyda aldaǵy demalys kúnderi qoǵamdyq kólikter júrmeidi, iaǵni avtobýstar men metro jumysy toqtatylady. Bul týraly Jandarbek Bekshin málim etti, dep habarlaidy "Ult aqparat".
«Demalys jáne mereke kúnderi qoǵamdyq kólikterdiń jumysyn toqtatamyz. Bul Almaty qalasy «qyzyl» aimaqtan shyqqanǵa deiin bolady. Bul negizgi epidemiiaǵa qarsy sharalardyń biri. Mundaǵy maqsatymyz - indettiń aldyn alý jáne keń taralýyn boldyrmaý»,-deidi ol.
Aita ketý kerek, 10 naýryzda Almaty qalasy koronavirýs boiynsha «qyzyl» aimaqqa engen bolatyn. Qalanyń Bas memlekettik sanitarlyq dárigeri Jandarbek Bekshin jańa qaýly shyǵardy. Oǵan sáikes demalys kúnderi, iaǵni, senbi jáne jeksenbi kúnderi qalada sport keshenderi, sporttyq-saýyqtyrý ortalyqtary men fitnes-ortalyqtar, sondai-aq, saýda, oiyn-saýyq ortalyqtary, saýda úileri men saýda jelileriniń qyzmetine tyiym salynǵan.
Ashyq bazarlarǵa (azyq-túliktik, azyq-túliktik emes) tek jeksenbide jumys isteýge tyiym salyndy. Sýpermarketter men gipermarketterdiń ýaqyty saǵat 06:00-den 02:00-ge deiin shekteldi.
