Almatyda 4 jasar búldirshin shuńqyrǵa jinalǵan sýǵa qulap, mert boldy, dep habarlaidy QazAqparat.
Almaty qalalyq politsiia departamentiniń málimetinshe, qaiǵyly oqiǵa Alataý aýdanyna qarasty «Qarasý» shaǵynaýdanynda bolǵan.
«Bul jaǵdai Alataý aýdandyq politsiia basqarmasynda tirkeldi. Qazirgi tańda sotaldy tergeý amaldary júrgizilip jatyr. Sot-meditsinalyq saraptama taǵaiyndaldy. Sonymen qatar, zańmen kózdelgen protsessýaldyq áreketter bar. Qaiǵyly oqiǵanyń mán-jaiy tolyq anyqtalady. Mindetti túrde zań aiasynda jaýapty adamdarǵa shara qoldanylady», - dedi Almaty qalalyq politsiia departamentiniń resmi ókili Saltanat Ázirbek.
BAQ betterinde jariialanǵan aqparatqa súiensek, búldirshinniń ómirin qiǵan lai sýǵa toly shuńqyr bir ai buryn qazylǵan.
«Qarasý» yqshamaýdanyndaǵy káriz júiesin ortalyqtandyrý úshin osy jerde arnaiy stantsiia qurylysy bastalypty.
Jerasty sýy kedergi keltirgen soń jumysty ýaqytsha toqtatyp qoiǵan.
Búgin Almatyda nóser jaýyn jaýyp, qala aýmaǵynda birqatar kóshe men turǵyn úidiń aýlasyn sý basyp qaldy.
Megapoliste sý tasqynyn joiý úshin jedel shtab quryldy. Jańbyr men daýyl saldarynan 19 aǵash qulady. Bir avtokólik pen bir úi zardap shekti.
