Almatyda búgin koronavirýspen aýyrǵan naýqastardy emdeýge arnalǵan jańa gospital ashyldy, - dep habarlaidy QazAqparat. Jańa ǵimarattyń ashylýyna qala ákimi Baqytjan Saǵyntaev qatysty.
Bul mekeme I.S Jekenova atyndaǵy qalalyq klinikalyq infektsiialyq aýrýhananyń bólimshesi bolmaq.
Bólimsheni Jedel shuǵyl meditsinalyq kómek kórsetý aýrýhanasy basshysynyń orynbasary Maǵaz Muqashev basqaratyn boldy.
Onyń aitýynsha, gospitalde 270 tájiribeli dáriger jumys isteidi.
Gospital naýqastardy kelesi aptadan bastap qabyldaityn bolady.
Qalalyq Qoǵamdyq densaýlyq saqtaý basqarmasy basshysynyń orynbasary Ásel Bisenbaevanyń aitýynsha, meditsinalyq qyzmetkerler qonaq úige ornalastyrylǵan.
«Barlyq qyzmetkerler qonaq úige ornalastyryldy. Olardy arnaiy avtobýs jetkizetin bolady. Olardy tamaqtandyrý máselesi sheshilgen», - dedi ol.
Aýmaǵy 5850 sharshy metr bolatyn jańa gospital bir mezette 280 naýqas qabyldai alady. Qarqyndy terapiia bólimine 28 oryn bólingen. Munda 28 ókpeni jeldetý apparaty bar.
Jobaǵa sáikes, munda 281 oryndyq palata, 3 oryndyq palatalar, zerthana bólmesi, KT jáne rentgen, bronhoskopiia, ÝZD apparaty bólimi bolady. 10 bir oryndyq palatanyń esigi syrttan bolmaq.
Ár boks jeldetý júiesimen qamtylady. Aýa tazartylady. Bokstarda teris qysym jasaý arqyly batsillalardyń dálizderge taralýyna kedergi jasalady.
Ǵimaratty 10 jyl paidalanýǵa bolady. Karantin merzimi aiaqtalǵan soń bul nysan ákimdikke beriledi. Ári qarai ony qai maqsatta paidalanýdy jergilikti bilik sheshedi. Jyldam turǵyzylatyn ǵimarat 9 baldyq jer silkinisine tótep bere alady.
Aita ketken jón, jańa gospital Alataý aýdanynda boi kóterdi. Qurylys jumystary 5 sáýirde bastalǵan bolatyn. Gospital salý týraly sheshimdi koronavirýs infektsiiasyna qarsy kúres maqsatynda qurylǵan QR Prezidenti janyndaǵy tótenshe jaǵdai rejimin qamtamasyz etý týraly Memlekettik komissiia qabyldaǵan edi.
Bul gospitaldi salýǵa 5,5 mlrd teńge jumsaldy.
Qurylys kompaniiasy jumsalǵan shyǵyndar týraly ashyq aqparat beretinin habarlaǵan bolatyn.
