Almaty qalasynyń ákimi Baqytjan Saǵyntaev «Almaty» telearnasyndaǵy Akimat Live tikelei efirinde koronavirýske qatysty jaǵdaidyń ýshyǵyp bara jatqanyn málimdedi jáne qala turǵyndaryn karantin talaptaryn qatań saqtaýǵa shaqyrdy, dep habarlaidy QazAqparat.
Baqytjan Saǵyntaevtyń aitýynsha, koronavirýs boiynsha epidemiologiialyq ahýal órship barady. 10 naýryzdan bastap Almaty «qyzyl» aimaqta. Indet bastalǵaly beri koronavirýs infektsiiasyn juqtyrǵan 32 597 naýqas tirkeldi (halyqtyń 100 myńyna shaqqandaǵy kórsetkish 1602,0 quraidy). 1 qańtar men 27 naýryz aralyǵynda 14 856, 2020 jyly qaýipti indetti juqtyrǵan 18521 naýqas tirkelgen.
20-27 naýryz aralyǵynda 3169 naýqas tirkeldi. Turǵyndar arasyndaǵy virýs juqtyrý deńgeii tómendemei tur. Jaǵdaidy almatylyqtardan anyqtalǵan virýstyń jańa shtamdary da qiyndatýda.
«Biylǵy jyldyń naýryz aiynda syrqattaný táýligine 132 jaǵdaidan kúrt ósýi baiqaldy, naýryz aiynyń úshinshi aptasynda táýligine ortasha eseppen 355 jaǵdaiǵa jetti, qazirgi ýaqytta táýligine 450-500 jaǵdai, bir mezgilde ósýimen táýligine 8000-ǵa deiin júrgizilgen PTR analizderiniń sany, onyń ishinde jeke zerthanalarda 4500-ge deiin ósti»,- deidi ákim.
Infektsiianyń negizgi oryndary KVI infektsiiasynyń barlyq jaǵdailarynyń shamamen 42% bolatyn saýda jáne tamaqtandyrý kásiporyndary bolyp qalatyndyqtan, tiisti sharalar qabyldandy. Osyǵan bailanysty karantin talaptary eki ret kúsheitildi. Ol 20-29 naýryz aralyǵynda.
«Barsha turǵyndardy karantin talaptaryn qatań saqtaýǵa, betperde kiiýge, áleýmettik araqashyqtyqty saqtaýǵa jáne kópshilik sharalar ótkizýden, adam kóp shoǵyrlanǵan jerge barýdan aýlaq bolýǵa shaqyramyn», - dedi B. Saǵyntaev.
