Almaty qalasy bilim basqarma basshysynyń orynbasary Qairat Jumanov onlain brifing barysynda 2020-2021 oqý jylynda 1-5 synyp aralyǵyndaǵy oqýshylardy oqytý formaty týraly málim etti, dep habarlaidy QazAqparat.
Onyń aitýynsha, Almaty qalasynyń bas memlekettik sanitar dárigeriniń 2021 jylǵy 2 naýryzdaǵy №6 qaýlysyna sáikes 1-5 synyp oqýshylary ata-analarynyń ótinishi boiynsha mektepke baryp oqityn boldy. Synyptaǵy balalar sany 25 adamnan aspaý kerek jáne sanitarlyq-epidemiialyq rejim qatań saqtalýy qajet. Al, halyqaralyq mektepterde 1-7 synyptar aralas oqytý formatyna kóshirildi.
«Qazir mektepterde aralas oqytýǵa 1-4 synyptardan - 19 050 oqýshy, 5 synyptyń – 1593 oqýshysy kóshti. Bilim berý uiymdary ákimshiliginiń sheshimi boiynsha sabaqtan tys ýaqytta 15 adamnan aspaityn toptarda oqýshylardy jeke oqytýǵa ruqsat etilgen,- dedi Qairat Jumanov.
Almatyda 287 myńnan astam oqýshyny qamtyp otyrǵan 278 mektep bar. Onyń 207-si memlekettik mektep bolsa, 71-i jeke menshik.
Aita ketsek, 2020-2021 jylǵy oqý jyly bastalǵaly oqýshylardyń basym kópshiligi pandemiiaǵa bailanysty qashyqtan oqytý formatynda bilim alǵan edi. Tek, ata-ananyń ótinishi boiynsha bastaýysh synyptarda kezekshi toptar ashylǵan. Oqý jylynyń ekinshi toqsany aiaqtalǵanda 9, 11 jáne 12 synyp oqýshylaryna mektepke baryp oqýǵa ruqsat berildi.
«Aita keteiik, mektepterdiń qyzmeti sanitarlyq epidemiologiialyq talaptardy qatań saqtai otyryp júzege asyrylady. Qalanyń barlyq mektepteri sanitarlyq qaýipsizdik dezinfektsiialyq quraldarymen (tonnelder, sanitaizerler, teplovizorlar, aiaq kiimge arnalǵan kilemshelermen 100% qamtamasyz etilgen», - deidi spiker.
