Almaty zoobaǵyndaǵy «kóripkel» shimpanze qaitys boldy.
Bul týraly aqparat Almaty zoobaǵynyń Instagram paraqshasynda paida boldy.
«Qurmetti dostar! Sizder bizdiń barlyq jaǵymdy jańalyqtarymyz ben qýanyshtarymyzdy birge bólisip, árdaiym qoldaý bildirip kelesizder. Bul joly qaiǵyly jaǵdaidy habarlaǵaly otyrmyz. Onkologiialyq aýrý saldarynan Tomiris atty shimpanzemiz qaitys boldy. Kishkentai Tomidi emdeý úshin álemdik deńgeidegi eń bilikti veterinar mamandar tartyldy. Keide meditsinanyń ózi aýyr derttiń aldynda dármensiz. Biz úshin bul aýyr jaǵdai boldy. Tomiristi barlyq zoobaq qyzmetkerleri men kelýshiler óte jaqsy kórdi. Ol óte talantty, shyǵarmashylyqqa beiim janýar edi. Tomi mýzykany erekshe súiip tyńdaityn.Tomiris bizdiń oiymyzda, júregimizde saqtalyp qalady», - dep jazdy zoobaq ákimshiligi.
Aita keteiik, 2014 jyly Almaty zoobaǵynda Tomiriske álem kýbogynyń finalistteri - Germaniia men Argentina quramalarynyń týyn usyndy. Ol Germaniia týyn tańdady. Nátijesinde nemister 1:0 esebimen Álem kýbogyn jeńip aldy.
Sodan beri ony zoobaq qyzmetkerleri men kelýshiler «kóripkel» Tomi deitin.
