Almaty zoobaǵynda sur kengýrý tóldedi, dep habarlaidy "Ult aqparat".
Zoobaqtyń baspasóz qyzmetinen habarlaǵandai, 2017 jyly Novosibir qalasynan Marat pen Lara atty sur kengýrý juby ákelingen bolatyn. Bul olardyń úshinshi tólderi.
«Mádi men Saia 2018 jáne 2019 jyldary týǵan bolatyn. Mádi qazir Barnaýlda turady. Úshinshi kengýrý byltyr qyrkúiekte týdy. Qashan týǵanyn dóp basyp aitý qiyn. Sebebi olar týysymen shaqalaq kúiinde qaltasyna kirip ketedi», - dedi baspasóz qyzmetinen.
Almaty zoobaǵynyń bas veterinar dárigeri Alina Chimirýktyń aitýynsha, jabaiy tabiǵat aiasynda janýarlardyń tirshiligine qolaisyz faktorlar jetkilikti.
«Olardyń mekeni tarylyp, azyq aýmaǵy azaiyp keledi. Tabiǵat lastanýy jáne bar. Zoobaqtar sol tabiǵattyń bir bólshegin saqtap qalýǵa tyrysyp jatyr» - dedi Alina Chimirýk.
Eresek kengýrý táýligine 3 keli jemis, sábiz, oramjapyraq jeidi.
