Búgin 10 naýryzdan bastap almatylyq jas mamandarǵa jeńildetilgen nesiemen baspana alýǵa múmkindik beretin «Almaty jastary» turǵyn úi baǵdarlamasy boiynsha ótinishter qabyldana bastady, dep habarlaidy "Ult aqparat".
Bul baǵdarlamaǵa jasy 35-ke tolmaǵan jastar qatysa alady. Otbasynda tek bir adamnyń ótinishi qabyldanady. Ótinish berýshiniń kúieýiniń nemese áieliniń jas ereksheligi eskerilmeidi. Sondai-aq, otbasynyń sońǵy bes jylda baspanasy bolmaýy tiis jáne jyljymaityn múlikke murager bolmaýy kerek.
«Almaty jastary» baǵdarlamasyna qatysýshylardyń sońǵy 6 aidaǵy zeinetaqy jarnasy bolýy nemese eń az degende jarty jyl Almatyda jeke kásipker retinde tirkelýi kerek. «Almaty jastary» turǵyn úi baǵdarlamasyna Almatydaǵy densaýlyq saqtaý, bilim, mádeniet jáne sport, JOO men ǴZI, BAQ, quqyq qorǵaý organdary men áleýmettik salada eńbek etetinder qatysa alady.
Atalǵan baǵdarlama aiasynda biyl 1000 páter beriledi. Sondai-aq, nesielendirý kólemi 13 millionnan 18 millionǵa artty.
Baspanaǵa úmitkerlerdiń ótinishi 10-31 naýryz aralyǵynda qabyldanady. Bul úshin ETsQ bolýy shart. Turǵyn úi basqarmasy ótinish berýshiniń qujattaryn muqiiat tekserip, jinaǵan upai mólsherine qarai qatysýshylardy anyqtaidy. Upai sany otbasynyń nekede bolǵan jyldary, bala sany, jumys istegen jyldaryna qatysty beriledi.
Ótinish berýshi 15 jumys kúni ishinde «Otbasy bankinde» óziniń tólem tólei alatynyn dáleldeý kerek. Sondai-aq, 45 kúnde alatyn baspanasyn taýyp, onyń baǵasyn anyqtaǵan qujatpen bankke qaita keledi. Baǵdarlamaǵa qatysýshyǵa taǵy on kún ýaqyt satý-satyp alý qujattaryn rásimdeýge beriledi. Páterdi birinshi deńgeili, ekinshi deńgeili bankter jáne «Qazaqstan turǵyn úi kompaniiasy» AQ nysandarynan kepildeme arqyly alýǵa bolady.
Alǵashqy jarna — 10%, paiyzdyq úles — 5%. Nesieniń eń úlken somasy 18 mln teńge (eger baspana 18 mln-nan qymbat bolsa ótinish berýshi qalǵan somany ózi shyǵarady).
Máselen, 10 mln teńgelik páter satyp alǵan jaǵdaida nesielik tólem turǵyn úi qurylys jinaq júiesimen eskere otyryp, alǵashqy 8 jylda 83 333 teńge, al qalǵan 11 jylda tólem kólemi azaiyp, 46 000 teńgeni quraidy.
