Almaty haiýanattar baǵynyń janýarlar kollektsiiasy jańa turǵyndarmen tolyqty. Zoobaqqa Soltústik Amerikany mekendeitin kanadalyq sileýsinderdiń juby jetkizildi, dep habarlaidy ult.kz.
Qalalyq ákimdiktiń málimetinshe, jyrtqyshtar halyqaralyq almasý baǵdarlamasy aiasynda biyl 6 sáýirde AQSh-tan ákelingen. Al olardyń ornyna Almaty haiýanattar baǵy óz qoryndaǵy jyrtqysh qustardy bergen.
Janýarlar kelgennen keiin mindetti karantindik kezeńnen ótip, veterinarlardyń baqylaýynda bolǵan. Qazir sileýsinder jańa ortaǵa tolyq beiimdelip, kelýshiler nazaryna usynylyp otyr.
Zoobaq mamandarynyń aitýynsha, atalyǵy – 3 jasta, analyǵy – 7 jasta. Olar usaq jyrtqyshtarǵa arnalǵan arnaiy keshenge ornalastyrylǵan. Keń volerde janýarlarǵa qajetti barlyq jaǵdai jasalǵan: arnaiy baspana, aýa salqyndatý jáne tuman búrký júieleri ornatylǵan. Ratsionyna balyq, siyr jáne taýyq eti kiredi.
Kanadalyq sileýsin – Soltústik Amerikanyń soltústik óńirlerinde tirshilik etetin mysyq tuqymdasyna jatatyn jyrtqysh ań. Ol sýyq klimatqa tózimdiligimen erekshelenedi. Qulaǵyndaǵy uzyn shashaqtary, qalyń júni men qarda erkin qozǵalýyna múmkindik beretin jalpaq tabandary bul túrdiń basty belgileri sanalady.
Sileýsinniń taǵy bir ereksheligi – qozǵalǵan kezde artqy aiaǵyn aldyńǵy aiaǵynyń izine dál basyp, dybyssyz júrýi. Al qulaqtaǵy shashaqtar ainaladaǵy dybysty jaqsy qabyldaýǵa kómektesedi.
Zoobaq qyzmetkerleri jańa juptyń Almatydaǵy mekenine sátti beiimdelip, bolashaqta urpaq órbitetinine úmit artyp otyr. Mamandardyń pikirinshe, bul sirek kezdesetin jyrtqysh túrdi saqtaý men kóbeitýge baǵyttalǵan mańyzdy qadam bolmaq.
