Almatyda politsiia qyzmetkerleri esirtki zerthanasyn anyqtady, dep habarlaidy "Ult aqparat".
Politsiia departamentiniń málimetinshe, zańsyz kásipti 27 jastaǵy almatylyq uiymdastyrǵan.
Ol kórshi úiden páter jaldap, sintetikalyq esirtkini sol jerde daiyndaǵan.
«Arnaiy is-sharany esirtkige qarsy kúres bóliminiń qyzmetkerleri uiymdastyrdy. Sh. esimdi azamattyń óziniń turǵylyqty jerine jaqyn ornalasqan jaldamaly páterin tintý kezinde «mefedron» sintetikalyq esirtkisin óndirýge arnalǵan komponentter men jabdyqtar tárkilendi. Sot-himiialyq saraptama tárkilengen zattardyń psihoaktivti zattarǵa jatatynyn rastady», – deidi Almaty qalalyq politsiia departamenti esirtki qylmysyna qarsy kúres basqarmasynyń bastyǵy Erlan Almaǵambetov.
Kúdikti qylmystyq jaýapkershilikke tartylyp, politsiia departametiniń ýaqytsha ustaý izoliatoryna qamaldy.
Sotqa deiingi tergeý júrip jatyr.
