Almaty túbinde 2017 jyldyń kúzinde bolǵan An-28 ushaǵynyń apaty týraly is boiynsha apelliatsiialyq sot qaýlysy jariialandy, - dep habarlaidy Tengrinews.kz.
Sot sheshimine sáikes East Wing áýekompaniiasynyń direktory Vitalii Masalitin Almaty mańyndaǵy áýe apatynda kinásiz dep tanyldy.
"Saraptama qorytyndysyna sáikes, An-28 kabinasy shamynyń fragmentterinde zaqym bar. Oń jaqtaǵy aldyńǵy jáne búiir tereze jaqtaýy qiraǵan. Bular áýe kemesi qulaǵanǵa deiin paida bolǵan. Belgisiz, qatty nysannyń áseri bolǵan. Onyń massasy - shamamen 1,1 keli.
Qalǵan zaqymdar (ushqyshtar kabinasynyń korpýsyndaǵy jáne fiýzeliajdaǵy synyqtar) áýe kemesi qulaǵannan keiin paida bolǵan", - delingen qujatta.
An-28 ushyp bara jatqanda aldyńǵy jáne búiir tereze jaqtaýlarynyń tiregi búlingennen keiin ony jel buzyp shyqqany atap ótildi. Onyń jyldamdyǵy 289 shaqyrym, aýa aǵynynyń qysymy bir sharshy santimetrge shamamen 0,5 keli nemese 30-50 kilopaskal bolǵan.
"Shamadan tys qysymda ekpindi tolqyn áserinen ushqyshtardyń miy ortasha silkinýi múmkin edi. Bul ondaǵan sekýndtan jarty saǵatqa deiin nemese odan da kóp ýaqytqa eseńgiretýi múmkin. Mundai jaǵdaidyń saldary ushaqty tizginnen shyǵaryp alýǵa, baǵyt, biiktik pen jyldamdyqtyń ózgerýine ákelýi múmkin.
Is boiynsha naqty derekter, atap aitqanda áýekompaniia qyzmetkerleriniń kýágerlik aiǵaqtary, mamandardyń, sot sarapshylarynyń qorytyndylary jáne olardyń sottaǵy aiǵaqtary, oqiǵa bolǵan jerdi tekserý nátijeleri, ushaqtyń apatqa ushyraýynyń anyqtalǵan mán-jailary men basqa da derekter áýekompaniia basshylyǵynyń kinásinen áýe kemesiniń apatqa ushyraýynyń tehnikalyq sebebi jáne ushqyshtardyń qateligi týraly aiyptaý nusqasyn rastamaidy", - delingen saraptama nátijesinde.
Eske salaiyq, 2017 jyldyń 3 qazanynda Almaty mańynda An-8 ushaǵy apatqa ushyraǵan edi. Almatydan ushqannan keiin 12 minýttan soń East Wing áýe kompaniiasynyń An-28 ushaǵy radardan joǵalyp ketken bolatyn.
Bortta bes adam bolǵan. Ushaq apatynan professor, dáriger, akýsher-ginekolog Talǵat Patsaev pen professor, dáriger-reanimatolog Jánibek Artyqbaev, komandir Gennadii Tsoi, ekinshi ushqysh Evgenii Kýtafin, bortinjener Beishenbek Aqmatbaev qaza tapty.
