Almaty qalalyq qylmystyq ister jónindegi mamandandyrylǵan aýdanaralyq soty Qyrǵyzstan parlamentiniń burynǵy depýtaty Damirbek Asylbekýýlýn "shekaradan kontrabandalyq taýar ótkizbek boldy" jáne "transulttyq uiymdasqan topqa qatysty" dep tanyp, 10 jyl túrme jazasyn kesti. Sot eks-depýtatty elden shyǵaryp, 5 jyl Qazaqstanǵa kirýge tyiym saldy.
Eks-depýtat jazasyn qaýipsizdigi joǵary mekemede óteidi. Sýdia Baqythan Bákirbaev Asylbekýýlýnyń jazany óteý merzimin qamaýda alynǵan sátinen - 2018 jyldyń 15 aqpanynan bastap esepke alýdy úkim etti.
Sot Qyrǵyzstannyń taǵy eki azamatyn - 39 jastaǵy Ýlanbek Mýradilov pen 34 jastaǵy Shyńǵys Abakirovaty "uiymdasqan topqa qatysy bar" dep tapty.
Jalpy sotqa tartylǵan 12 adamnyń qalǵanyna úkim oqyp jatqanda aiyptalýshylardyń týystary "Masqara!" dep aiqailap, sotqa narazylyq bildirdi. Artynsha aiyptalýshylar tóbelesip qaldy da, sýdia Bákirbaev zalda otyrǵandardy shyǵaryp jibermek boldy. Biraq sýdia talaby oryndalmai, arty daýǵa ulasqan soń Bákirbaev úzilis jariialap, zaldan ózi shyǵyp ketti.
Jarty saǵatqa jýyq ýaqytqa sozylǵan úzilisten soń sot zalyna advokattar men qoǵamdyq qorǵaýshylar, jýrnalister qaita shaqyrylyp, úkim oqý jalǵasty.
Sýdia úkimi mynadai:
- Esbol Japbasov 14 jylǵa sottaldy.
- Ýlanbek Mýradilov 10 jylǵa sottaldy. Qazaqstannan shyǵarylyp, elge kirýine 5 jylǵa tyiym salyndy.
- Shyńǵys Abakirov 10 jylǵa sottaldy. Qazaqstannan shyǵarylyp, elge kirýine 5 jylǵa tyiym salyndy.
- Madiiar Nurmanov 3 jylǵa sottaldy.
- Muhit Tynybaev 3 jylǵa sottaldy.
- Daniiar Qojamqulov 3 jylǵa sottaldy.
- Nurǵali Áýelbekov 3 jylǵa sottaldy.
- Dosbol Jappasov 5 jylǵa bostandyǵy shektelip, sot zalynan bosatyldy.
- Muhit Qazaqpai 5 jylǵa bostandyǵy shektelip, sot zalynan bosatyldy.
- Sanjar Sáýlembaev 5 jylǵa bostandyǵy shektelip, sot zalynan bosatyldy.
- Qýanysh Baigelov 5 jylǵa bostandyǵy shektelip, sot zalynan bosatyldy.
"Aiyptalýshylar áreketinen Qazaqstan ekonomikasyna 99 million teńgeden asa zalal keldi" dep somanyń óndirilýin talap etken Almaty kiris departamentiniń shaǵymy jeke azamattyq iste qaralýy kerek" dedi sýdia.
Prokýrorlar aktisinde Asylbekýýlýnyń 2016 jyly qarashada "depýtattyq qyzmetin paida tabý jáne zańsyz baiý maqsatyna paidalanyp, transulttyq uiymdasqan qylmystyq top qurǵany" aitylǵan. Prokýrorlardyń sózinshe, ol qylmystyq topty "Qyrǵyzstannan Qazaqstan men Reseige zańsyz taýar jiberý úshin basqarǵan".
Aiyptaýshylar Damirbek Asylbekýlýýn 13 jylǵa sottaýdy suraǵan.
Damirbek Asylbekýýlý 2018 jyly 15-16 aqpan kúnderi sol kezdegi Ońtústik Qazaqstan oblysy men Jambyl oblysynda ótken arnaiy operatsiia barysynda ustalǵan. Onymen birge ustalǵan 34 adamnyń arasynda keden organdary, shekara qyzmetiniń laýazymdy tulǵalary, brokerler bolǵan. Ustalǵandardyń úsheýi – Qyrǵyzstan azamaty.
Bul is boiynsha Asylbekýýlýnan ózge 11 adam sotqa tartylǵan.
Almaty qalasynyń Almaly aýdandyq soty 17 aqpanda Qyrǵyzstan azamattaryn eki aiǵa tutqyndaý týraly sheshim shyǵaryp, keiin qamaý merzimin birneshe ret uzartqan. Sot barysynda Damirbek Asylbekýýlý Qazaqstan azamattyǵynan airylǵany belgili boldy.
